سیدنا زر رضی اللہ عنہ کہتے ہیں: ایک شخص نے عبداللہ رضی اللہ عنہ کے سامنے طہ کو مفتوح پڑھا۔ اس پر عبداللہ رضی اللہ عنہ نے طہ مسکورہ پڑھا۔ تو آپ کو اس شخص نے کہا: اس کا مطلب یہ ہے کہ (اے محبوب) اپنے قدم مبارک کو زمین پر رکھا کریں۔ تو عبداللہ رضی اللہ عنہ نے کہا: رسول اللہ صلی اللہ علیہ وسلم نے ایسے ہی پڑھا ہے اور ایسے ہی سیدنا جبریل امین علیہ السلام نے اُتارا ہے۔ (نوٹ: رسول اللہ صلی اللہ علیہ وسلم ایک قدم پر نماز پڑھا کرتے تھے، اس طرح لمبے قیام کی وجہ سے آپ کے قدم شریف سوج گئے تھے، تو اللہ تعالیٰ نے فرمایا: اے محبوب اپنے دونوں قدم بیک وقت زمین کے ساتھ لگا کر رکھا کریں۔ شفیق) ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ اسی حدیث کو محمد بن عبداللہ بن عاصم نے اپنی سند کے ہمراہ روایت کیا ہے اور اس میں انہوں نے کہا ہے: تو عبداللہ رضی اللہ عنہ نے کہا: خدا کی قسم مجھے رسول اللہ صلی اللہ علیہ وسلم نے ایسے ہی سکھایا ہے۔ [المستدرك على الصحيحين/كتاب التفسير/حدیث: 3002]