سیدنا ابن عباس رضی اللہ عنہما اللہ تعالیٰ کے اس ارشاد: اَلَمْ تَرَ اِلَی الَّذِیْنَ خَرَجُوْا مِنْ دِیَارِھِمْ وَھُمْ اُلُوف حذر الموت (البقرۃ: 243) ” اے محبوب کیا تم نے نہ دیکھا تھا انہیں جو اپنے گھروں سے نکلے اور وہ ہزاروں تھے موت کے ڈر سے “۔ آپ فرماتے ہیں: وہ لوگ 4000 تھے، وہ طاعون سے خوفزدہ ہو کر نکلے اور وہ کہنے لگے: ہم ایسی جگہ جا رہے ہیں، جہاں ہمیں موت نہیں آئے گی۔ اللہ تعالیٰ نے ان سے کہا: تم مر جاؤ، تو وہ مر گئے۔ پھر ان کے پاس ایک نبی کا گزر ہوا، اس نے اللہ تعالیٰ سے ان کے زندہ کرنے کا سوال کیا۔ اللہ تعالیٰ نے ان کو زندہ کر دیا، یہی وہ لوگ ہیں جن کے لیے اللہ تعالیٰ نے فرمایا: وَھُمْ اُلُوف حَذَرَ الْمَوْتِ “ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كتاب التفسير/حدیث: 3150]