سیدنا عبداللہ بن عباس رضی اللہ عنہما فرماتے ہیں: نبی اکرم صلی اللہ علیہ وسلم کی جس طرح جنگ احد کے موقع پر مدد کی گئی اس طرح کبھی نہیں کی گئی۔ سیدنا عبداللہ بن عتبہ رضی اللہ عنہ کہتے ہیں: ہم نے اس بات کا انکار کیا تو سیدنا ابن عباس رضی اللہ عنہما بولے: میرے موقف اور منکرین کے موقف میں قرآن پاک فیصلہ کرے گا۔ اللہ تعالیٰ نے یوم احد کے متعلق فرمایا: وَلَقَدْ صَدَقَکُمُ اللّٰہُ وَعْدَہٗٓ اِذْ تَحُسُّوْنَھُمْ بِاِذْنِہٖ (آل عمران: 152) ” اور بیشک اللہ نے تمہیں سچ کر دکھایا اپنا وعدہ جب کہ تم اس کے حکم سے کافروں کو قتل کرتے تھے “۔۔ سیدنا ابن عباس رضی اللہ عنہما فرماتے ہیں:” حس “ کا مطلب ” قتل “ ہے۔ حَتّٰی اِذَا فَشِلْتُمْ وَ تَنَازَعْتُمْ فِی الْاَمْرِ وَعَصَیْتُمْ مِّنْم بَعْدِ مَآ اَٰرکُمْ مَّا تُحِبُّوْنَ مِنْکُمْ مَّنْ یُّرِیْدُ الدُّنْیَا وَمِنْکُمْ مَّنْ یُّرِیْدُ الْاٰخِرَۃَ ثُمَّ صَرَفَکُمْ عَنْمْ لِیَبْتَلِیَکُمْ وَ لَقَدْ عَفَا عَنْکُمْ وَ اللّٰہُ ذُوْ فَضْلٍ عَلَی الْمُؤْمِنِیْنَ (آل عمران: 152) ” یہاں تک کہ جب تم نے بزدلی کی اور حکم میں جھگڑا ڈالا اور نافرمانی کی بعد اس کے کہ اللہ تعالیٰ تمہیں دکھا چکا تمہاری خوشی کی بات تم میں کوئی دنیا چاہتا تھا اور تم میں کوئی آخرت چاہتا تھا پھر تمہارا منہ ان سے پھیر دیا کہ تمہیں آزمائے اور بیشک اس نے تمہیں معاف کر دیا اور اللہ مسلمانوں پر فضل کرتا ہے “۔۔ اور اس (جماعت) سے مراد تیراندازوں کی جماعت ہے۔ اس کا واقعہ یہ ہے کہ نبی اکرم صلی اللہ علیہ وسلم نے ان کو ایک خاص مقام پر تعینات کیا تھا اور یہ تاکید فرمائی تھی کہ ” تم لوگ ہماری بیک سائیڈ کی حفاظت کرتے رہنا اگر تم یہ دیکھو کہ ہمیں قتل کیا جا رہا ہے تو تم ہماری مدد کے لیے ہرگز نہ آنا اور اگر تم دیکھو کہ ہم مالِ غنیمت جمع کر رہے ہیں تو ہمارے ساتھ شریک مت ہونا “ پھر جب رسول اللہ صلی اللہ علیہ وسلم کو فتح حاصل ہوئی اور صحابہ کرام رضوان اللہ علیہم اجمعین مال غنیمت جمع کرنے لگے، مشرکین کو شکست ہوئی تو یہ تیرانداز اپنے اس مقام سے نیچے اترے اور جنگ میں مالِ غنیمت لوٹنے میں مصروف ہو گئے۔ (سیدنا عبداللہ بن عباس رضی اللہ عنہما نے ایک ہاتھ کی انگلیاں دوسرے ہاتھ کی انگلیوں میں ڈال کر اشارہ کر کے فرمایا: پھر مسلمانوں کی صفیں یوں آپس میں خلط ملط ہو گئیں، جب تیراندازوں نے وہ درہ خالی کر دیا تو وہیں سے گھڑسواروں کی ایک جماعت (پچھلے راستے سے آ کر) وہاں سے میدان جنگ میں داخل ہوئی اور صحابہ کرام رضوان اللہ علیہم اجمعین پر حملہ کر دیا۔ انہوں نے بہت سے مسلمانوں کو شہید کر دیا، جبکہ رسول اللہ صلی اللہ علیہ وسلم اور صحابہ کرام رضوان اللہ علیہم اجمعین شروع دن سے ہی جنگ میں مصروف تھے حتیٰ کہ مشرکین کے علمبرداروں میں سے سات یا نو افراد کو قتل کر دیا اور مسلمانوں نے شکست کھانے کے بعد پہاڑ کی جانب (جہاں گھڑ سوار داخل ہو چکے تھے) دوبارہ حملہ کیا اور ابھی وہ وہاں پہنچے نہیں تھے کہ لوگوں نے کہا: لوگوں کی جماعت تو پانی کے اس چشمے کے نیچے ہے۔ ادھر شیطان نے چلا کر آواز دی: محمد صلی اللہ علیہ وسلم کو قتل کر دیا گیا ہے۔ ہم کو اس خبر کے سچی ہونے میں کوئی شک نہ تھا اور ہم مسلسل اسی یقین میں تھے کہ اب تو محمد صلی اللہ علیہ وسلم کو قتل کر دیا گیا ہے۔ یہاں تک کہ رسول اللہ صلی اللہ علیہ وسلم سیدنا سعد بن ابی وقاص رضی اللہ عنہ اور سیدنا سعد بن عبادہ رضی اللہ عنہ کے درمیان سامنے تشریف لے آئے، میں نے آپ صلی اللہ علیہ وسلم کو جھک کر چلنے کی وجہ سے پہچان لیا، آپ صلی اللہ علیہ وسلم فرماتے ہیں: ہمیں اس قدر خوشی ہوئی گویا کہ ہمیں کبھی بھی کوئی مصیبت آئی ہی نہیں تھی، آپ صلی اللہ علیہ وسلم ہماری طرف چڑھ کر تشریف لے آئے۔ اس وقت آپ صلی اللہ علیہ وسلم کہہ رہے تھے: اللہ تعالیٰ اس قوم پر شدید غضب فرمائے، جنہوں نے اپنے نبی کے چہرہ کو خون آلود کروا دیا، پھر آپ صلی اللہ علیہ وسلم یوں فرماتے:” اے اللہ! ان کی یہ شان نہیں کہ وہ ہم پر غالب آئیں، حتیٰ کہ آپ صلی اللہ علیہ وسلم ہم تک پہنچ گئے، آپ صلی اللہ علیہ وسلم ہمارے پاس پہنچ کر ابھی کچھ دیر ہی ٹھہرے تھے کہ ابوسفیان پہاڑ کے دامن سے چیخ چیخ کر کہنے لگا: ھبل کی شان بلند ہو، ھبل کی شان بلند ہو، یعنی وہ اپنے جھوٹے معبودوں کی شان میں باتیں کرنے لگا (اور کہنے لگا) ابن ابی کبثہ کہاں ہے؟ ابن ابی قحافہ کہاں ہے؟ ابن الخطاب کہاں ہے؟ سیدنا عمر فاروق رضی اللہ عنہ نے اس کو جواب دینے کی نبی اکرم صلی اللہ علیہ وسلم سے اجازت مانگی تو آپ صلی اللہ علیہ وسلم نے اجازت دے دی، چنانچہ جب اس نے کہا: ھبل کی شان بلند ہو، تو سیدنا عمر رضی اللہ عنہ نے کہا: اللہ تعالیٰ ہی سب سے اعلیٰ اور بزرگ ہے، ابوسفیان نے کہا: اے ابن الخطاب آج کا دن تمہارے خاموش رہنے کا دن ہے، اس نے پھر کہا: ابن کبثہ کہاں ہے؟ ابن قحافہ کہاں ہے؟ ابن خطاب کہاں ہے؟ سیدنا عمر رضی اللہ عنہ نے جواباً کہا: یہ ہیں رسول اللہ صلی اللہ علیہ وسلم یہ ہیں سیدنا ابوبکر رضی اللہ عنہ اور یہ میں عمر رضی اللہ عنہ ہوں، ابوسفیان نے کہا: آج کا دن ” بدر “ کا بدلہ ہے۔ دن بدلتے رہتے ہیں اور جنگ تو نام ہی مقابلہ کا ہے۔ سیدنا عمر رضی اللہ عنہ بولے: کوئی برابری نہیں ہے، ہمارے شہید جنتی ہیں جبکہ تمہارے مقتول دوزخی ہیں۔ اس نے کہا: اگر تمہارا یہ گمان درست ہے تو ہم خائب و خاسر ہیں۔ پھر ابوسفیان نے کہا: تم اپنے مقتولوں میں بعض کی شکلیں بگڑی پاؤ تو وہ ہمارے بڑوں کی اجازت سے نہیں کیا گیا، پھر اس پر وہی جاہلیت کی حمیت غالب آ گئی اور اس نے کہا لیکن بہرحال اگر ایسا ہو جائے تو ہم اس کو ناپسند نہیں کرتے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كتاب التفسير/حدیث: 3201]