سیدنا عبداللہ بن عباس رضی اللہ عنہما فرماتے ہیں: رسول اللہ صلی اللہ علیہ وسلم نے ارشاد فرمایا: جب ” احد “ میں تمہارے بھائی شہید ہوئے تو اللہ تعالیٰ نے ان کی روحوں کو پرندوں کے قالب میں ڈال دیا، جو جنت کی نہروں پر گھومتے ہیں، جنت کے پھل کھاتے ہیں۔ پھر عرش کے سائے میں لٹکتی ہوئی قندیلوں کے پاس آتے ہیں۔ جب ان کو انتہائی عمدہ کھانے ملتے ہیں، عمدہ مشروبات اور بہترین آرامگاہیں ملتی ہیں تو وہ کہتے ہیں: کون ہے جو ہمارے بھائیوں کو یہ اطلاع دے دے کہ ہم جنت میں زندہ ہیں، ہمیں یہاں رزق ملتا ہے (اور ہمارے بھائیوں کو ہماری طرف سے یہ تاکید کر دیں کہ) جہاد سے سستی اور جنگ میں بزدلی کا مظاہرہ ہرگز نہ کریں تو اللہ تعالیٰ نے یہ آیت نازل فرمائی: وَلَا تَحْسَبَنَّ الَّذِیْنَ قُتِلُوْا فِیْ سَبِیْلِ اللّٰہِ (آل عمران: 169) ” اور جو اللہ کی راہ میں مارے گئے ہرگز انہیں مُردہ نہ خیال کرنا “۔۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كتاب التفسير/حدیث: 3203]