سیدنا عبداللہ بن الزبیر رصی اللہ عنہ فرماتے ہیں: نجاشی کے علاقے سے اس کے کچھ دشمنوں نے نجاشی پر حملہ کیا تو (مکۃ المکرمہ سے ہجرت کر کے حبشہ جانے والے) مہاجرین نجاشی کے پاس گئے اور کہنے لگے: ہم آپ کے ہمراہ جنگ میں شرکت کرنا چاہتے ہیں اور ہماری جرات و بہادری سے آپ واقف ہی ہیں، آپ نے ہمارے ساتھ جو حسن سلوک کیا ہے ہم اس کا شکریہ ادا کرنا چاہتے ہیں۔ لیکن نجاشی نے یہ کہتے ہوئے ان کو انکار کر دیا کہ اللہ تعالیٰ کی مدد پر بھروسہ کرنا لوگوں کی مدد پر بھروسہ کرنے سے بہتر ہے۔ (عبداللہ) کہتے ہیں: انہی کے متعلق قرآن پاک کی یہ آیت نازل ہوئی: وَ اِنَّ مِنْ اَھْلِ الْکِتٰبِ لَمَنْ یُّؤْمِنُ بِاللّٰہِ وَ مَآ اُنْزِلَ اِلَیْکُمْ وَمَآ اُنْزِلَ اِلَیْھِمْ خٰشِعِیْنَ لِلّٰہِ (آل عمران: 199) ” اور بے شک کچھ کتابی ایسے ہیں کہ اللہ پر ایمان لاتے ہیں اور اس پر جو تمہاری طرف اُترا اور جو ان کی طرف اُترا اُن کے دل اللہ کے حضور جھکے ہوئے “۔ “۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كتاب التفسير/حدیث: 3214]