سیدنا ابوہریرہ رضی اللہ عنہ فرماتے ہیں: جب ابوطالب کی وفات کا وقت قریب آیا تو نبی اکرم صلی اللہ علیہ وسلم اس کے پاس تشریف لائے، اس وقت ان کے پاس عبداللہ بن ابی امیہ اور ابوجہل بن ہشام بھی موجود تھا، رسول اللہ صلی اللہ علیہ وسلم نے ابوطالب سے کہا: اے چچا! مجھے سب سے زیادہ آپ کی شفقت حاصل رہی، سب سے زیادہ میرے اوپر آپ کا حق ہے بلکہ میرے اوپر میرے والد سے بھی بڑھ کر آپ کا حق ہے۔ آپ ایک مرتبہ ایک جملہ بول دیں جس کی وجہ سے میں آپ کی قیامت میں شفاعت کر سکوں۔ تم پڑھو ” لا الٰہ الّا اللہ “ اس پر ابوجہل اور عبداللہ بولے: کیا تم عبدالمطلب کے دین سے منحرف ہو جاؤ گے؟ تو ابوطالب خاموش رہے۔ رسول اللہ صلی اللہ علیہ وسلم نے دوبارہ اس کو دین کی دعوت پیش کی لیکن اس نے کہا: میں عبدالمطلب کے دین پر ہوں۔ اس کے بعد اس کا انتقال ہو گیا۔ نبی اکرم صلی اللہ علیہ وسلم نے فرمایا: میں تیرے لیے اس وقت تک دعائے مغفرت کرتا رہوں گا جب تک مجھے روک نہ دیا جائے تو اللہ تعالیٰ نے یہ آیت نازل فرما دی: (مَا کَانَ لِلنَّبِیِّ وَالَّذِیْنَ ٰامَنُوْآ اَنْ یّسْتَغْفِرُوْا لِلْمُشْرِکِیْنَ) (التوبۃ: 113) ” نبی اور ایمان والوں کو لائق نہیں کہ مشرکوں کی بخشش چاہیں اگرچہ وہ رشتہ دار ہوں جبکہ انہیں کھل چکا کہ وہ دوزخی ہیں “۔ پوری آیت اور (وَمَا کَانَ اسْتِغْفَارُ اِبْرَاھِیْمَ لِاَبِیْہِ) (التوبۃ: 114) الی اخر الایۃ ” اور ابراہیم علیہ السلام کا اپنے باپ کی بخشش چاہنا “۔ (ترجمعہ کنزالایمان،) پوری آیت۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ کیونکہ یونس اور عقیل نے یہ حدیث زہری کے واسطے سے سعید سے روایت کرنے میں ارسال کیا ہے۔ [المستدرك على الصحيحين/كتاب التفسير/حدیث: 3330]