سیدنا سدی رضی اللہ عنہ کہتے ہیں: میں سیدنا مرہ ہمدانی رضی اللہ عنہ سے اللہ تعالیٰ کے ارشاد: وَاِنْ مِّنْکُمْ اِلَّا وَارِدُہھا کَانَ عَلٰی رَبِّکَ حَتْمًا مَّقْضِیًّا (مریم: 71) ” اور تم میں ایسا کوئی نہیں ہے جس کا گزر دوزخ پر نہ ہو تمہارے رب کے ذمہ پر ضرور ٹھہری ہوئی بات ہے “۔ کے متعلق پوچھا تو انہوں نے بتایا کہ سیدنا عبداللہ بن مسعود رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: لوگوں کو دوزخ پر لایا جائے گا، پھر لوگ اپنے اپنے اعمال کی مطابقت سے وہاں سے گزریں گے، سب سے پہلے لوگ بجلی کی چمک کی طرح گزر جائیں گے، پھر (جو ان سے نچلے درجے کے ہوں گے وہ) ہوا کی طرح گزریں گے (اور جو ان سے نچلے درجے کے ہوں گے وہ) تیز رفتار گھوڑے کی طرح گزریں گے۔ پھر (جو ان سے نچلے درجے کے ہوں گے وہ) تیز دوڑ والے گھوڑے کی طرح (پھر جو ان سے نچلے درجے کے لوگ ہوئے وہ) بوجھ اٹھانے والے جانور کی طرح اور پھر (جو ان سے نچلے درجے کے ہوں گے وہ) پیدل لوگوں کی طرح وہاں سے گزریں گے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كتاب التفسير/حدیث: 3462]