سیدنا عبداللہ بن عباس رضی اللہ عنہما سے روایت ہے، انہوں نے کہا: جب یہ آیت نازل ہوئی: ﴿إِنَّكُمْ وَمَا تَعْبُدُونَ مِنْ دُونِ اللَّهِ حَصَبُ جَهَنَّمَ أَنْتُمْ لَهَا وَارِدُونَ﴾ ”بے شک تم اور جن کی تم اللہ کے سوا عبادت کرتے ہو، سب جہنم کا ایندھن ہو، تم سب اس میں داخل ہونے والے ہو۔“ [سورة الأنبياء: 98] تو مشرکین (اعتراضاً) کہنے لگے: فرشتوں، عیسیٰ اور عزیر علیہم السلام کی بھی تو اللہ کے سوا عبادت کی جاتی ہے (تو کیا وہ بھی جہنم میں جائیں گے؟)، اس پر یہ آیت نازل ہوئی: ﴿لَوْ كَانَ هَؤُلَاءِ آلِهَةً مَا وَرَدُوهَا﴾ ”اگر یہ (معبود) واقعی الٰہ ہوتے تو اس (جہنم) میں وارد نہ ہوتے۔“ [سورة الأنبياء: 99] یعنی وہ باطل معبود جن کی عبادت پر وہ راضی تھے، پھر اللہ تعالیٰ نے (مقدس ہستیوں کے بارے میں) یہ آیت نازل فرمائی: ﴿إِنَّ الَّذِينَ سَبَقَتْ لَهُمْ مِنَّا الْحُسْنَى أُولَئِكَ عَنْهَا مُبْعَدُونَ﴾ ”بے شک وہ لوگ جن کے لیے ہماری طرف سے پہلے ہی بھلائی کا فیصلہ ہو چکا ہے، وہ اس (جہنم) سے دور رکھے جائیں گے۔“ [سورة الأنبياء: 101] اور اس سے مراد سیدنا عیسیٰ، سیدنا عزیر علیہم السلام اور فرشتے ہیں۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب التفسير/حدیث: 3490]