سیدنا عمر بن خطاب رضی اللہ عنہ فرماتے ہیں: جب رسول اللہ صلی اللہ علیہ وسلم پر وحی نازل ہوتی تو آپ سے ایسی آواز سنائی دیا کرتی تھی جیسی شہد کی مکھی کی بھنبھناہٹ ہوتی ہے۔ (ایک دفعہ اسی طرح آپ صلی اللہ علیہ وسلم پر وحی نازل ہو رہی تھی) تھوری دیر کے بعد آپ نے قبلہ رو ہو کر ہاتھ بلند کیے اور یوں دعا مانگی ” اے اللہ! ہماری تعداد بڑھا، کم نہ کر، ہمیں عزت دے اور ہمیں بے عزت نہ فرما اور ہمیں عطا کر، ہمیں محروم نہ رکھ، ہمیں غلبہ دے اور ہم پر کسی کو غلبہ نہ دے۔ ہم سے راضی ہو جا اور ہمیں راضی کر، پھر آپ نے فرمایا: میرے اوپر دس آیتیں ایسی نازل ہوئی ہیں کہ جو شخص ان پر عمل پیرا ہو جائے، جنتی ہے۔ پھر آپ نے یہ آیتیں تلاوت کیں: قَدْ اَفْلَحَ الْمُؤْمِنُوْنَ (المؤمنون: 1) ” بیشک مراد کو پہنچے ایمان والے “۔ الَّذِیْنَ ھُمْ فِیْ صَلًاتِھِمْ خٰشِعُوْنَ (المؤمنون: 2) ” وہ جو اپنی نماز میں گڑگڑاتے ہیں “۔ دس آیتیں تلاوت کیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كتاب التفسير/حدیث: 3521]