سیدنا عباس بن عبدالمطلب رضی اللہ عنہ سے روایت ہے کہ ہم بطحاء کے مقام پر رسول اللہ صلی اللہ علیہ وسلم کے ساتھ بیٹھے ہوئے تھے کہ ایک بادل گزرا، تو رسول اللہ صلی اللہ علیہ وسلم نے پوچھا: ”کیا تم جانتے ہو یہ کیا ہے؟“ ہم نے عرض کیا: اللہ اور اس کا رسول بہتر جانتے ہیں، آپ صلی اللہ علیہ وسلم نے فرمایا: ”یہ «السَّحَابُ» (بادل) ہے۔“ ہم نے بھی کہا: بادل ہے۔ پھر آپ صلی اللہ علیہ وسلم نے فرمایا: ”اور یہ «المُزْنُ» (برستا ہوا بادل) ہے۔“ ہم نے بھی کہا: «المُزْنُ» ہے۔ پھر آپ صلی اللہ علیہ وسلم نے فرمایا: ”اور یہ «العَنَانُ» (آسمان کے کنارے چھایا ہوا بادل) ہے،“ پھر آپ صلی اللہ علیہ وسلم کچھ دیر خاموش رہے، پھر پوچھا: ”کیا تم جانتے ہو کہ آسمان اور زمین کے درمیان کتنا فاصلہ ہے؟“ ہم نے عرض کیا: اللہ اور اس کا رسول بہتر جانتے ہیں، آپ صلی اللہ علیہ وسلم نے فرمایا: ”ان دونوں کے درمیان پانچ سو سال کی مسافت کا فاصلہ ہے، اور ہر آسمان سے دوسرے آسمان تک بھی پانچ سو سال کی مسافت کا فاصلہ ہے، اور ہر آسمان کی موٹائی پانچ سو سال کی مسافت ہے، اور ساتویں آسمان کے اوپر ایک سمندر ہے جس کے اوپر اور نچلے حصے کے درمیان اتنا ہی فاصلہ ہے جتنا زمین اور آسمان کے درمیان ہے، پھر اس کے اوپر آٹھ «أَوْعالٍ» (پہاڑی بکروں کی شکل کے فرشتے) ہیں (جن کی قامت) زمین اور آسمان کے درمیانی فاصلے جتنی ہے، اور اللہ تعالیٰ ان سب کے اوپر ہے اور اس پر بنی آدم کے اعمال میں سے کچھ بھی پوشیدہ نہیں ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب التفسير/حدیث: 3589]