سیدنا عبداللہ بن عباس رضی اللہ عنہما فرماتے ہیں: سیدنا سلیمان بن داؤد علیہما السلام کھڑے کھڑے نماز پڑھتے ہوئے فوت ہوئے اور شیاطین کو آپ کی وفات کا پتہ نہ چلا۔ یہاں تک کہ مٹی نے ان کے عصا کو کھا لیا تو آپ گر پڑے (اصل بات یہ تھی) جب بھی کوئی پودا اُگتا تو آپ اس سے پوچھتے: تو کس مرض کی دوا ہے؟ تو وہ پودا آپ کو اپنے تمام فوائد اور نقصانات بتاتا جیسا کہ اللہ تعالیٰ نے فرمایا ہے: وَ لِسُلَیْمٰنَ الرِّیْحَ غُدُوُّھَا شَھْرٌ وَّ رَوَاحُھَا شَھْرٌ وَ اَسَلْنَا لَہٗ عَیْنَ الْقِطْرِ (سبا: 12) ” اور سلیمان کے بس میں ہوا کر دی اس کی صبح کی منزل ایک مہینہ کی راہ اور شام کی منزل ایک مہینے کی راہ اور ہم نے اس کے لیے پگھلے ہوئے تانبے کا چشمہ بہایا “۔ اس کے بعد کی تمام آیات۔ جب خرنوب اُگا، تو آپ نے اس سے پوچھا: تو کس لئے اُگا ہے؟ اس نے کہا: اس مسجد کو برباد کرنے کے لیے۔ آپ نے فرمایا: اس مسجد کی بربادی میری موت کے وقت ہو گی (تو یقیناً اب میری موت کا وقت قریب ہے) تب وہ کھڑے ہو کر نماز میں مصروف ہو گئے۔ (خرنوب: سیاہ رنگ کا ایک درخت ہوتا ہے جو کہ ملک شام کے پہاڑی علاقوں میں اُگتا ہے، عراقی بچے اس کو شامی کھیرا کہتے ہیں۔ شفیق) ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كتاب التفسير/حدیث: 3626]