سیدنا عبداللہ بن عباس رضی اللہ عنہما اللہ تعالیٰ کے ارشاد: وَ اِنَّ مِنْ شِیْعَتِہٖ لَاِبْرَاھِیْمَ (الصافات: 83) ” اور بیشک اسی کے گروہ سے سیدنا ابراہیم ہیں۔“ کے متعلق فرماتے ہیں۔ سیدنا نوح علیہ السلام کے طریقہ کار پر ابراہیم علیہ السلام کاربند تھے۔ وہ (اسماعیل علیہ السلام) کام کاج میں ان (ابراہیم علیہ السلام) کا ہاتھ بٹایا کرتے تھے۔ جب عمل میں وہ ان کے معاون ہو گئے۔ فَلَمَّآ اَسْلَمَا (الصافات: 103) ” تو جب ان دونوں نے ہمارے حکم پر گردن رکھی۔“ یعنی جس چیز کا انہیں حکم دیا گیا تھا۔ وَ تَلَّہٗ لِلْجَبِیْنِ (الصافات: 103) ” اور ان کے چہرے کے بل زمین پر لٹایا۔“ تو (سیدنا اسماعیل علیہ السلام نے) کہا: آپ اپنی نظروں کے سامنے مجھے ذبح نہ کریں، کہیں ایسا نہ ہو کہ آپ کو مجھ پر ترس آ جائے اور آپ مجھے ذبح کرنے سے رک جائیں۔ اس لئے آپ میرے ہاتھ میری گردن پر باندھ دیں پھر میرا چہرہ زمین پر رکھ دیں، جب آپ نے ان کو ذبح کرنے کے لئے ہاتھ بڑھایا تو ابھی چھری نہیں چلائی تھی کہ ان کو آواز آئی ” اے ابراہیم علیہ السلام آپ نے خواب سچ کر دکھایا۔ اب اپنا ہاتھ روک لیں اور ہم نے ایک بڑا ذبیحہ ان کے فدیہ میں دے کر ان کو بچا لیا وہ ایک عظیم خوبصورت مینڈھا تھا اور سیدنا عبداللہ بن عباس رضی اللہ عنہما کا موقف یہ ہے کہ یہ ذبیح سیدنا اسماعیل علیہ السلام تھے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كتاب التفسير/حدیث: 3654]