سیدنا طاؤس رحمۃ اللہ علیہ کہتے ہیں: ایک شخص سیدنا عبداللہ بن عمرو بن العاص رضی اللہ عنہ کے پاس یہ پوچھنے کے لئے آیا کہ مخلوق کی تخلیق کس چیز سے ہوئی؟ آپ نے فرمایا: پانی، روشنی، اندھیرے، ہوا اور مٹی سے۔ اس شخص نے سوال کیا: یہ چیزیں کس سے بنائی گئی ہیں؟ آپ نے فرمایا: مجھے معلوم نہیں۔ پھر وہ شخص سیدنا عبداللہ بن الزبیر رضی اللہ عنہ کے پاس گیا اور ان سے یہ سوال کیا۔ انہوں نے بھی سیدنا عبداللہ بن عمرو رضی اللہ عنہ جیسا جواب دیا۔ پھر وہ سیدنا عبداللہ بن عباس رضی اللہ عنہما کے پاس گیا اور ان سے پوچھا: مخلوق کس چیز سے بنائی گئی؟ انہوں نے فرمایا: پانی، روشنی، اندھیرے اور ہوا اور مٹی سے۔ اس نے کہا: یہ چیزیں کس سے پیدا کی گئی ہیں؟ تو سیدنا عبداللہ بن عباس رضی اللہ عنہما نے اس آیت کی تلاوت کی: وَ سَخَّرَ لَکُمْ مَّا فِی السَّمٰوٰتِ وَ مَا فِی الْاَرْضِ جَمِیْعًا مِّنْہُ (الجاثیۃ: 13) ” اور تمہارے لیے کام میں لگائے جو کچھ آسمانوں میں ہے اور جو کچھ زمین میں ہے۔“ اپنے حکم سے۔ اس شخص نے کہا: مجھے یہ بات صرف نبی اکرم صلی اللہ علیہ وسلم کے اہل بیت میں سے ایک شخص (یعنی ابن عباس رضی اللہ عنہما) نے بتائی ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كتاب التفسير/حدیث: 3728]