سیدنا ابوالطفیل رضی اللہ عنہ کہتے ہیں: میں نے سیدنا علی ابن ابی طالب رضی اللہ عنہ کو دیکھا کہ وہ منبر پر کھڑے ہوئے اور بولے: مجھ سے پوچھ لو، اس سے قبل کہ تم مجھ سے پوچھ نہ سکو اور میرے بعد مجھ جیسا کوئی آدمی تمہیں نہیں ملے گا جس سے تم سوال کر سکو (راوی) کہتے ہیں: ابن الکواء کھڑا ہوا، اور بولا: اے امیرالمومنین رضی اللہ عنہ: وَ الذَّارِیٰتِ ذَرْوًا (الذاریات: 1) ” قسم ان کی جو بکھیر کر اڑانے والیاں۔“ (سے مراد کیا ہے)۔ آپ نے فرمایا: ہوائیں۔ اس نے کہا: فَالْحٰمِلٰتِ وِقْرًا (الذاریات: 2) ” بوجھ اٹھانے والیاں۔“ (سے کیا مراد ہے) آپ نے فرمایا: بادل۔ اس نے کہا: فَالْجٰرِیٰتِ یُسْرًا (الذاریات: 3) ” نرم چلنے والیاں۔“ (سے کیا مراد ہے) آپ نے فرمایا: کشتیاں۔ اس نے کہا: فَالْمُقَسِّمٰتِ اَمْرًا (الذاریات: 4) ” حکم سے بانٹنے والیاں۔“ (سے کیا مراد ہے) آپ نے فرمایا: فرشتے۔ اس نے کہا: وہ کون ہیں (جن کے متعلق یہ آیت ہے): الَّذِیْنَ بَدَّلُوْا نِعْمَۃَ اللّٰۃِ کُفْرًا وَّ اَحَلُّوْا قَوْمَھُمْ دَارَ الْبَوَارِ جَھَنَّمَ (ابراہیم: 28 , 29) ” جنہوں نے اللہ کی نعمت ناشکری سے بدل دی اور اپنی قوم کو تباہی کے گھر لا اتارا۔“ آپ نے فرمایا: وہ قریش کے منافقین ہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كتاب التفسير/حدیث: 3778]