سعید بن جبیر رحمہ اللہ سے روایت ہے کہ میں ایک سال تک سیدنا ابن عباس رضی اللہ عنہما کی خدمت میں حاضر ہوتا رہا مگر (ان کی ہیبت کی وجہ سے) ان سے بات نہ کر سکا اور وہ مجھے پہچانتے نہ تھے، پھر ابن عباس رضی اللہ عنہما نے مجھ سے پوچھا: تم کون ہو؟ میں نے عرض کی: اہل عراق میں سے ہوں، انہوں نے پوچھا: کن میں سے؟ میں نے کہا: بنو اسد سے، انہوں نے پوچھا: کیا ان کے حروری (خارجی) فرقے سے ہو یا ان میں سے جن پر اللہ نے انعام کیا؟ میں نے عرض کی: ان میں سے جن پر اللہ نے انعام کیا، انہوں نے فرمایا: اب سوال کرو، میں نے پوچھا: ﴿لَا أُقْسِمُ بِيَوْمِ الْقِيَامَةِ﴾ [سورة القيامة: 1] کا کیا مطلب ہے؟ انہوں نے فرمایا: تمہارا رب اپنی مخلوق میں سے جس چیز کی چاہے قسم کھاتا ہے، میں نے پوچھا: اور ﴿وَلَا أُقْسِمُ بِالنَّفْسِ اللَّوَّامَةِ﴾ [سورة القيامة: 2] ؟ انہوں نے فرمایا: اس سے مراد وہ ملامت زدہ نفس ہے جو گناہوں پر نادم ہو، میں نے پوچھا: ﴿أَيَحْسَبُ الْإِنْسَانُ أَلَّنْ نَجْمَعَ عِظَامَهُ ٭ بَلَى قَادِرِينَ عَلَى أَنْ نُسَوِّيَ بَنَانَهُ﴾ [سورة القيامة: 3-4] ؟ انہوں نے فرمایا: اگر اللہ چاہتا تو انسان کی انگلیوں کے پوروں کو اونٹ کے کھر یا گدھے کے سم جیسا بنا دیتا، میں نے پوچھا: ﴿فَمُسْتَقَرٌّ وَمُسْتَوْدَعٌ﴾ [سورة الأنعام: 98] کا کیا مطلب ہے؟ انہوں نے فرمایا: «مستقر» سے مراد رحمِ مادر ہے اور «مستودع» سے مراد باپ کی پشت ہے۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب التفسير/حدیث: 3920]