سیدہ عائشہ رضی اللہ عنہا سے روایت ہے، انہوں نے کہا کہ رسول اللہ صلی اللہ علیہ وسلم نے فرمایا: ”چھ لوگوں پر میں نے لعنت کی ہے، اور اللہ اور ہر وہ نبی جس کی دعا قبول ہوتی ہے، نے بھی ان پر لعنت کی ہے: (1) اللہ کی کتاب میں اضافہ کرنے والا، (2) اللہ کی تقدیر کو جھٹلانے والا، (3) تکبر و جبر کے ساتھ مسلط ہونے والا، تاکہ اسے ذلیل کرے جسے اللہ نے عزت دی ہے اور اسے عزت دے جسے اللہ نے ذلیل کیا ہے، (4) اللہ کی حرام کردہ چیزوں کو حلال سمجھنے والا، (5) میری اولاد (اہلِ بیت) کے بارے میں اس چیز کو حلال سمجھنے والا جسے اللہ نے حرام کیا ہے، (6) اور میری سنت کو چھوڑنے والا۔“
امام بخاری رحمہ اللہ نے اپنی ”الجامع الصحیح“ میں اسحاق بن محمد الفروی اور عبدالرحمٰن بن ابی الموال سے حجت پکڑی ہے، اور یہ سند پہلی سند کی نسبت زیادہ درست ہے۔ [المستدرك على الصحيحين/كتاب التفسير/حدیث: 3985]