سیدنا زید بن ارقم رضی اللہ عنہ فرماتے ہیں: جب سورۃ لہب: تَبَّتْ یَدَآ اَبِیْ لَھَبٍ وَّتَبَّ مَآ اَغْنٰی عَنْہُ مَالُہٗ وَ مَا کَسَبَ سَیَصْلٰی نَارًا ذَاتَ لَھَبٍ وَّ امْرَاَتُہٗ حَمَّالَۃَ الْحَطَبِ فِیْ جِیْدِھَا حَبْلٌ مِّنْ مَّسَدٍ ” تباہ ہو جائیں ابولہب کے دونوں ہاتھ اور وہ تباہ ہو ہی گیا (اسے کچھ کام نہ آیا اس کا مال اور نہ جو کمایا، اب دھنستا ہے لپٹ مارتی آگ میں وہ اور اس کی جورو لکڑیوں کا گٹھا سر پر اٹھائے اس کے گلے میں کھجور کی چھال کا رسا “۔ نازل ہوئی تو ابولہب کی بیوی سے کہا گیا: محمد نے تیری مذمت کی ہے۔ وہ رسول اکرم صلی اللہ علیہ وسلم کے پاس آئی، اس وقت آپ صحابہ کرام رضوان اللہ علیہم اجمعین میں بیٹھے ہوئے تھے۔ وہ آ کر بولی: اے محمد صلی اللہ علیہ وسلم ! تم میری مذمت کیوں کرتے ہو؟ آپ نے فرمایا: خدا کی قسم! تیری مذمت میں نے نہیں کی بلکہ اللہ تعالیٰ نے تیری مذمت کی ہے۔ اس نے کہا: کیا تم نے مجھے دیکھا ہے، میں لکڑیوں کا گٹھا اٹھاتی ہوں، یا تو نے دیکھا ہے میرے گلے میں کھجور کی شال کا رسا ہے۔ پھر وہ چلی گئی، پھر کئی دن گزر گئے اور رسول اکرم صلی اللہ علیہ وسلم پر کوئی وحی نازل نہ ہوئی تو وہ آپ کے پاس آئی اور بولی: اے محمد! میرا خیال ہے کہ آپ کے اللہ تعالیٰ نے آپ کو چھوڑ دیا ہے۔ تو اللہ تعالیٰ نے یہ آیات نازل فرمائیں: وَالضُّحٰی وَ الَّیْلِ اِذَا سَجٰی مَا وَدَّعَکَ رَبُّکَ وَ مَا قَلٰی ” چاشت کی قسم، اور رات کی جب پردہ ڈالے، کہ تمہیں تمہارے رب نے نہ چھوڑا، اور نہ مکروہ جانا “ ٭٭ یہ حدیث صحیح ہے جیسا کہ ہمارے شیخ نے بیان کی ہے مگر یہ کہ مجھے اس میں علت مل گئی ہے۔ [المستدرك على الصحيحين/كتاب التفسير/حدیث: 3989]