ام المومنین سیدہ عائشہ رضی اللہ عنہا فرماتی ہیں: جب رسول اللہ صلی اللہ علیہ وسلم کو سیدنا جعفر رضی اللہ عنہ کی شہادت (کی خبر) پہنچی تو آپ کے چہرے پر رنج کے آثار نمایاں تھے۔ آپ کے پاس کوئی آنے والا آیا اور بولا: یا رسول اللہ صلی اللہ علیہ وسلم عورتیں تو ہمارے لئے آزمائش بن چکی ہیں۔ یا (شاید کہا کہ) ہم پر غالب ہو چکی ہیں۔ آپ علیہ السلام نے فرمایا: جا کر ان کو چپ کراؤ۔ وہ پھر حضور صلی اللہ علیہ وسلم کے پاس دوبارہ (سہ بارہ) آیا اور آپ صلی اللہ علیہ وسلم نے اس کو تین مرتبہ ہی واپس بھیج دیا اور (بالآخر) فرمایا: اگر وہ نہ مانیں تو ان کے منہ میں مٹی ڈال دو۔ ام المومنین سیدہ عائشہ رضی اللہ عنہا فرماتی ہیں: میں نے اپنے دل میں اس آدمی سے کہا: اللہ تعالیٰ تجھے دور کرے۔ میں جانتی ہوں کہ تو رسول اللہ صلی اللہ علیہ وسلم کے حکم کی تعمیل نہیں کر سکے گا اور تو نے اپنے آپ کو نہ چھوڑا حتی کہ میں جان گئی کہ تو ان کے منہ میں مٹی ڈالنے کی طاقت بھی نہیں رکھتا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب المغازي والسرايا/حدیث: 4397]