سیدنا سفیان رضی اللہ عنہ فرماتے ہیں: نبی اکرم صلی اللہ علیہ وسلم نے ہجرت سے پہلے متعدد حج کئے اور ہجرت کے بعد صرف حجۃ الوداع کیا۔ اور آپ ایک سو اونٹ قربانی کے لئے ساتھ لائے تھے جن کے ناک میں چاندی کی نکیلیں تھیں۔ نبی اکرم صلی اللہ علیہ وسلم نے 63 اونٹ خود اپنے ہاتھ سے نحر کئے اور باقی سیدنا علی رضی اللہ عنہ نے نحر کئے، ثوری سے پوچھا گیا: یہ حدیث تمہیں کس نے بتائی؟ تو انہوں نے بتایا: امام جعفر صادق نے اپنے والد (امام باقر) کے حوالے سے سیدنا جابر رضی اللہ عنہ سے روایت کی اور ابن ابی لیلی نے مقسم کے واسطے سے سیدنا عبداللہ بن عباس رضی اللہ عنہما سے روایت کی۔ ٭٭ امام حاکم کہتے ہیں: وہ احادیث ماثورہ جن میں حجۃ الوداع کی تفصیل موجود ہے جن کو شیخین رحمۃ اللہ علیہما نے نقل کیا ہے، ان کی سندیں شیخین رحمۃ اللہ علیہما کے معیار کے مطابق صحیح ہیں۔ ان تمام میں سب سے جامع روایت وہ ہے جو جابر بن محمد صادق نے اپنے والد کے واسطے سے سیدنا جابر رضی اللہ عنہ سے نقل کی ہے۔ جس کو صرف امام مسلم بن حجاج رحمۃ اللہ علیہ نے نقل کیا ہے اور ہم اللہ کے فضل و کرم اور اس کی مدد سے رسول اللہ صلی اللہ علیہ وسلم کی مرض الوفات کے آغاز (سے متعلق روایات) تک آ پہنچے ہیں۔ [المستدرك على الصحيحين/كتاب المغازي والسرايا/حدیث: 4430]