سیدنا زید بن ارقم رضی اللہ عنہ سے روایت ہے کہ میں رسول اللہ صلی اللہ علیہ وسلم کی خدمت میں حاضر تھا کہ یمن کا ایک شخص آیا اور اس نے نبی کریم صلی اللہ علیہ وسلم کو ایک واقعہ بتاتے ہوئے عرض کیا: اے اللہ کے رسول! سیدنا علی رضی اللہ عنہ کے پاس تین ایسے آدمی آئے جو ایک بچے کے بارے میں جھگڑ رہے تھے، ان تینوں نے ایک ہی طہر (پاکی کے ایام) میں ایک خاتون سے تعلق قائم کیا تھا، تو سیدنا علی رضی اللہ عنہ نے ان میں سے باری باری دو دو افراد سے کہا کہ تم اس بچے سے دستبردار ہو کر اپنے تیسرے ساتھی کے حق میں خوش دلی کا مظاہرہ کرو، مگر وہ راضی نہ ہوئے، پھر انہوں نے فرمایا: ”تم ایسے شریک ہو جو باہم جھگڑ رہے ہو، اب میں تمہارے درمیان قرعہ اندازی کروں گا، جس کے نام قرعہ نکلے گا بچہ اسی کا ہوگا اور اسے اپنے بقیہ دو ساتھیوں کو (بچے کی) دیت کا دو تہائی حصہ ادا کرنا ہوگا،“ چنانچہ انہوں نے قرعہ اندازی کی اور ان میں سے ایک کے نام قرعہ نکلا تو انہوں نے بچہ اس کے حوالے کر دیا، یہ سن کر رسول اللہ صلی اللہ علیہ وسلم مسکرا دیے یہاں تک کہ آپ صلی اللہ علیہ وسلم کے دندانِ مبارک ظاہر ہو گئے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4710]