سیدنا عبداللہ بن جعفر رضی اللہ عنہ سے روایت ہے، وہ کہتے ہیں کہ جب رسول اللہ صلی اللہ علیہ وسلم نے دیکھا کہ رحمت نازل ہو رہی ہے تو آپ صلی اللہ علیہ وسلم نے فرمایا: ”انہیں میرے پاس بلاؤ، انہیں میرے پاس بلاؤ،“ سیدہ صفیہ رضی اللہ عنہا نے پوچھا: اے اللہ کے رسول! کن کو بلاؤں؟ آپ صلی اللہ علیہ وسلم نے فرمایا: ”میرے اہل بیت یعنی علی، فاطمہ، حسن اور حسین کو،“ چنانچہ وہ انہیں لے آئیں، پھر نبی کریم صلی اللہ علیہ وسلم نے اپنی چادر ان پر ڈال دی، پھر اپنے ہاتھ اٹھا کر دعا فرمائی: «اللَّهُمَّ هَؤُلَاءِ آلي، فَصَلِّ عَلَى مُحَمَّدٍ وَعَلَى آلِ مُحَمَّدٍ» ”اے اللہ! یہ میری آل ہیں، پس تو محمد اور آلِ محمد پر اپنی رحمتیں نازل فرما،“ اور اللہ عزوجل نے یہ آیت نازل فرمائی: ﴿إِنَّمَا يُرِيدُ اللَّهُ لِيُذْهِبَ عَنْكُمُ الرِّجْسَ أَهْلَ الْبَيْتِ وَيُطَهِّرَكُمْ تَطْهِيرًا﴾ ”اللہ تو یہی چاہتا ہے کہ اے نبی کے گھر والو! تم سے ناپاکی دور کر دے اور تمہیں پوری طرح پاک کر دے۔“ [سورة الأحزاب: 33]
یہ حدیث صحیح الاسناد ہے لیکن شیخین نے اسے روایت نہیں کیا، جبکہ امام بخاری اور امام مسلم کی شرط پر یہ روایت صحیح ثابت ہے کہ آپ صلی اللہ علیہ وسلم نے صحابہ کو اپنے اہل بیت پر درود پڑھنا اسی طرح سکھایا جس طرح اپنی آل پر درود سکھایا تھا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4760]