سیدنا ابوہریرہ رضی اللہ عنہ سے روایت ہے کہ میں جب بھی حسین بن علی رضی اللہ عنہما کو دیکھتا ہوں تو میری آنکھوں سے آنسو بہنے لگتے ہیں، اور یہ اس لیے ہے کہ ایک دن رسول اللہ صلی اللہ علیہ وسلم گھر سے نکلے، مجھے مسجد میں پایا، میرا ہاتھ پکڑا اور مجھ پر ٹیک لگائی، میں آپ کے ساتھ چل پڑا یہاں تک کہ آپ بنو قینقاع کے بازار پہنچے، آپ صلی اللہ علیہ وسلم نے مجھ سے کوئی بات نہیں کی، وہاں چکر لگایا اور دیکھا، پھر واپس آئے اور میں بھی آپ کے ساتھ واپس آیا، آپ مسجد میں گوٹ مار کر بیٹھ گئے اور مجھ سے فرمایا: ”چھوٹے بچے کو میرے پاس بلاؤ“، پس حسین دوڑتے ہوئے آئے اور آپ صلی اللہ علیہ وسلم کی گود میں گر گئے، پھر انہوں نے اپنا ہاتھ رسول اللہ صلی اللہ علیہ وسلم کی داڑھی مبارک میں ڈالا، تو رسول اللہ صلی اللہ علیہ وسلم حسین کا منہ کھول کر اپنا لعابِ دہن ان کے منہ میں ڈالنے لگے اور فرمانے لگے: «اللَّهُمَّ إِنِّي أُحِبُّهُ فَأَحِبَّهُ» ”اے اللہ! میں اس سے محبت کرتا ہوں پس تو بھی اس سے محبت فرما۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4883]