ابوعمار شداد بن عبداللہ سے مروی ہے کہ سیدنا ام الفضل بنت الحارث، رسول اللہ صلی اللہ علیہ وسلم کی خدمت میں حاضر ہوئیں اور عرض کی: یا رسول اللہ صلی اللہ علیہ وسلم میں نے گزشتہ رات ایک خطرناک خواب دیکھا ہے۔ آپ علیہ السلام نے پوچھا: وہ کیا ہے؟ انہوں نے عرض کی: وہ بہت خطرناک ہے۔ آپ صلی اللہ علیہ وسلم نے پوچھا: وہ کیا ہے؟ انہوں نے کہا: میں نے دیکھا ہے کہ آپ کے جسم کا ایک ٹکڑا کاٹ کر میری گود میں رکھ دیا گیا ہے۔ رسول اللہ صلی اللہ علیہ وسلم نے فرمایا: تم نے یہ اچھا خواب دیکھا ہے (اس کی تعبیر یہ ہے کہ) فاطمہ رضی اللہ عنہا کے ہاں بچہ پیدا ہو گا ان شاء اللہ تعالیٰ اور وہ تمہاری گود میں دیا جائے گا۔ چنانچہ سیدہ فاطمہ رضی اللہ عنہا کے ہاں سیدنا حسین رضی اللہ عنہ کی ولادت ہوئی اور رسول اللہ صلی اللہ علیہ وسلم کے فرمان کے مطابق وہ میری گود میں دیئے گئے۔ ایک دن میں حضور صلی اللہ علیہ وسلم کی خدمت میں حاضر ہوئی اور سیدنا حسین رضی اللہ عنہ کو آپ کی گود میں دے دیا۔ کچھ دیر بعد جب میں نے توجہ کی تو رسول اللہ صلی اللہ علیہ وسلم کی آنکھوں سے آنسو جاری تھے، میں نے پوچھا: یا نبی اللہ صلی اللہ علیہ وسلم ! میرے ماں باپ آپ پر قربان ہو جائیں کیا وجہ ہے؟ (آپ کیوں رو رہے ہیں؟) آپ نے فرمایا: میرے پاس سیدنا جبریل امین علیہ السلام تشریف لائے تھے، انہوں نے مجھے بتایا کہ میری امت اس کو شہید کر دے گی۔ میں نے (بڑے تعجب خیز لہجے میں) پوچھا: اس کو؟ آپ نے فرمایا: جی ہاں۔ اور وہ اس (کے مقام شہادت) کی سرخ مٹی بھی میرے پاس لائے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4878]

سیدنا قتادہ رضی اللہ عنہ فرماتے ہیں: سیدہ فاطمہ رضی اللہ عنہا کے ہاں سیدنا حسن رضی اللہ عنہ کی پیدائش کے ایک سال اور دس ماہ بعد سیدنا حسین رضی اللہ عنہ کی ولادت ہوئی، (اس سے ثابت ہوا کہ) سیدنا حسین رضی اللہ عنہ کی پیدائش ہجرت کے چھ سال اور ساڑھے پانچ ماہ بعد ہوئی۔ جبکہ آپ کی شہادت 10 محرم الحرام، 61 ہجری کو ہوئی، شہادت کے وقت آپ کی عمر شریف 54 سال تھی۔ ٭٭ میں نے اس موضوع پر تفصیلی احادیث شہادت حسین رضی اللہ عنہ کے باب میں بیان کر دی ہیں، سننے اور یاد رکھنے والے کے لئے وہی کافی ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4879]

سیدنا یعلی عامری سے مروی ہے کہ وہ رسول اللہ صلی اللہ علیہ وسلم کے ہمراہ ایک دعوت میں شرکت کے لئے نکلے۔ نبی اکرم صلی اللہ علیہ وسلم تمام لوگوں سے آگے نکلے، وہاں پر سیدنا حسین رضی اللہ عنہ بچوں کے ساتھ کھیل رہے تھے، رسول اللہ صلی اللہ علیہ وسلم ان کو پکڑنے لگے لیکن وہ کبھی ادھر بھاگ جاتے کبھی ادھر بھاگ جاتے، رسول اللہ صلی اللہ علیہ وسلم بھی ان کے پیچھے پیچھے دوڑنے لگے بالآخر آپ نے ان کو پکڑ کر ان کا ایک ہاتھ اپنی گردن پر رکھا اور دوسرا ہاتھ اپنی ٹھوڑی کے نیچے دے کر اپنا منہ ان کے منہ سے لگا کر ان کا بوسہ لیا، پھر فرمایا: حسین مجھ سے اور میں حسین سے ہوں، اللہ اس سے محبت کرتا ہے جو حسین سے محبت کرتا ہے، حسین میرا نواسہ ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4880]

سیدنا ابوہریرہ رضی اللہ عنہ فرماتے ہیں: میں نے رسول اللہ صلی اللہ علیہ وسلم کو دیکھا آپ حسین بن علی رضی اللہ عنہما کو اٹھائے ہوئے تھے اور فرما رہے تھے ” اے اللہ! میں نے اس سے محبت کرتا ہوں تو بھی اس سے محبت فرما “۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ ایک دوسری سند کے ہمراہ اسی طرح کی ایک روایت سیدنا حسن رضی اللہ عنہ کے بارے میں بھی منقول ہے اور یہ دونوں ” محفوظ “ ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4881]

سیدنا عبداللہ بن عباس رضی اللہ عنہما فرماتے ہیں: اللہ تعالیٰ نے سیدنا محمد صلی اللہ علیہ وسلم کی طرف وحی فرمائی کہ میں نے سیدنا یحیی بن زکریا علیہ السلام کے بدلے میں ستر ہزار لوگ مارے تھے جبکہ میں تمہارے نواسے کے بدلے اس سے دگنے لوگ موت کے گھاٹ اتاروں گا۔ ٭٭ یہ لفظ امام شافعی رحمۃ اللہ علیہ کی روایت کے ہیں جبکہ قاضی ابوبکر بن کامل کی روایت میں یہ الفاظ ہیں ” میں نے یحیی بن زکریا علیہ السلام کے خون کے بدلے میں (ستر ہزار لوگ) قتل کئے تھے اور تمہارے نواسے کے خون کے بدلے (اس سے دگنے لوگ) قتل کروں گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4882]

سیدنا ابوہریرہ رضی اللہ عنہ فرماتے ہیں: میں جب بھی سیدنا حسین رضی اللہ عنہ کو دیکھتا میری آنکھوں میں آنسو آ جاتے۔ اس کی وجہ یہ تھی کہ ایک دن رسول اللہ صلی اللہ علیہ وسلم کاشانہ اقدس سے باہر تشریف لائے، میں اس وقت مسجد میں موجود تھا، آپ علیہ السلام نے میرا ہاتھ تھام کر میرے ساتھ ٹیک لگائی، پھر میں آپ کے ہمراہ چلتے چلتے بنی قینقاع کے بازار تک گیا، اس دوران آپ صلی اللہ علیہ وسلم نے میرے ساتھ کوئی بات چیت نہیں کی، آپ نے بازار کا ایک چکر لگایا اور کچھ دیکھتے رہے پھر واپس چل دیئے، میں بھی آپ کے ہمراہ واپس ہو لیا، آپ مسجد میں تشریف لائے اور احتباء فرما کر بیٹھ گئے (احتباء ایک خاص انداز میں بیٹھنے کو کہتے ہیں) آپ صلی اللہ علیہ وسلم نے مجھے فرمایا: میرے پاس لکاع کو بلاؤ، پھر سیدنا حسین رضی اللہ عنہ دوڑتے ہوئے آئے اور آ کر آپ صلی اللہ علیہ وسلم کی گود میں بیٹھ گئے اور آپ کی داڑھی مبارک سے کھیلنے لگ گئے، رسول اللہ صلی اللہ علیہ وسلم ان کا منہ کھول کر اس میں اپنا لعاب دہن ڈالتے اور ساتھ ساتھ یوں دعا مانگتے ” اے اللہ! میں اس سے محبت کرتا ہوں، تو بھی اس سے محبت کر “۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4883]

سیدنا ام الفضل رضی اللہ عنہا فرماتی ہیں: رسول اللہ صلی اللہ علیہ وسلم نے مجھ سے فرمایا: (اس وقت سیدنا حسین رضی اللہ عنہ آپ صلی اللہ علیہ وسلم کی گود میں تھے) بے شک مجھے جبریل علیہ السلام نے بتایا ہے کہ میری امت حسین رضی اللہ عنہ کو شہید کر دے گی۔ ٭٭ ابن ابی سمینہ نے یہ حدیث اختصار کے ساتھ بیان کی ہے جبکہ دیگر کئی راویوں نے محمد بن مصعب کے حوالے سے یہی حدیث مکمل بیان کی ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4884]

سیدنا یحیی بن سعید فرماتے ہیں: ہم سیدنا علی بن حسین رضی اللہ عنہما کے پاس تھے کہ کوفہ کے کچھ لوگ ان کے پاس آئے۔ سیدنا علی بن حسین رضی اللہ عنہما نے ان سے کہا: اے اہل عراق! تم ہم سے اس طرح محبت رکھو جس طرح اسلام کے ساتھ محبت رکھتے ہو، میں نے اپنے والد سے سنا ہے کہ رسول اللہ صلی اللہ علیہ وسلم نے فرمایا: اے لوگو! تم مجھے میرے مرتبے سے آگے مت بڑھاؤ کیونکہ اللہ تعالیٰ نے مجھے نبی بنانے سے پہلے مجھے اپنا بندہ بنایا ہے۔ (یحیی بن سعید فرماتے ہیں) میں نے یہی حدیث سیدنا سعید بن مسیب رضی اللہ عنہ کو سنائی تو انہوں نے کہا: اور آپ کو نبی بنانے کے بعد بھی (آپ کو بندہ ہی قرار دیا)۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4885]