سیدنا عبداللہ بن عباس رضی اللہ عنہما سے روایت ہے کہ سیدنا براء بن معرور رضی اللہ عنہ پہلے شخص تھے جنہوں نے لیلۃ العقبیٰ کے موقع پر انصار کے ستر افراد کی موجودگی میں رسول اللہ صلی اللہ علیہ وسلم کے ہاتھ پر بیعت کی، پس براء بن معرور کھڑے ہوئے، اللہ کی حمد و ثنا بیان کی اور پھر فرمایا: ”تمام تعریفیں اللہ کے لیے ہیں جس نے ہمیں محمد صلی اللہ علیہ وسلم کے ذریعے عزت بخشی اور ہمیں آپ صلی اللہ علیہ وسلم کی صورت میں (رہبر) عطا کیا، ہم پکارنے والے کی پکار پر لبیک کہنے والے اولین اور پکارے جانے والے آخری لوگ تھے، ہم نے اللہ عزوجل کی دعوت قبول کی اور سمع و طاعت کا مظاہرہ کیا، اے گروہِ اوس و خزرج! یقیناً اللہ تعالیٰ نے تمہیں اپنے دین کے ذریعے معزز کیا ہے، لہٰذا اگر تم شکر گزاری کے ساتھ سمع و طاعت اور تعاون و نصرت کا عہد کرتے ہو تو اللہ اور اس کے رسول کی اطاعت کرو،“ پھر وہ بیٹھ گئے۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4893]