ابن اسحاق کہتے ہیں کہ قبیلہ اسلم کے ایک شخص نے مجھے بتایا کہ ابوجہل نے صفا کے مقام پر رسول اللہ صلی اللہ علیہ وسلم کا راستہ روکا، آپ صلی اللہ علیہ وسلم کو اذیت دی، گالیاں دیں اور آپ صلی اللہ علیہ وسلم کے دین کی عیب جوئی کرتے ہوئے سخت الفاظ کہے، رسول اللہ صلی اللہ علیہ وسلم نے اسے کوئی جواب نہ دیا، صفا کے اوپر عبداللہ بن جدعان تیمی کی ایک لونڈی اپنے مکان میں یہ سب سن رہی تھی، پھر ابوجہل وہاں سے کعبہ کے پاس قریش کی مجلس میں جا بیٹھا، تھوڑی ہی دیر میں سیدنا حمزہ بن عبدالمطلب اپنی کمان لٹکائے شکار سے واپس آئے، ان کا معمول تھا کہ جب بھی شکار سے آتے تو قریش کی مجلس کے پاس رکتے، انہیں سلام کرتے اور گفتگو کرتے، وہ قریش کے نہایت معزز اور بہادر شخص تھے اور اس وقت تک اپنی قوم کے دین پر تھے، جب وہ لونڈی کے پاس سے گزرے تو اس نے کہا: ”اے ابوعمارہ! کاش آپ دیکھتے کہ ابھی تھوڑی دیر پہلے آپ کے بھتیجے محمد ( صلی اللہ علیہ وسلم ) کو ابوالحکم (ابوجہل) سے کندی تکلیف پہنچی، اس نے انہیں یہاں پا کر اذیت دی، گالیاں دیں اور ناپسندیدہ باتیں کیں اور پھر چلا گیا جبکہ محمد ( صلی اللہ علیہ وسلم ) نے اسے کوئی جواب نہ دیا“، یہ سن کر حمزہ غصے سے بھر گئے، پس وہ تیزی سے نکلے اور کسی کے پاس نہ رکے، ان کا ارادہ ابوجہل سے بدلہ لینا تھا، جب وہ مسجد حرام میں داخل ہوئے اور اسے لوگوں میں بیٹھا دیکھا تو اس کی طرف بڑھے اور اس کے سر پر کھڑے ہو کر اپنی کمان سے اس کے سر پر بھرپور ضرب لگائی، قبیلہ بنو مخزوم کے لوگ ابوجہل کی مدد کے لیے کھڑے ہوئے اور کہنے لگے: ”اے حمزہ! ہمیں لگتا ہے کہ تم بھی صابی (مسلمان) ہو گئے ہو؟“ حمزہ نے کہا: ”مجھے اس سے کیا چیز روک سکتی ہے جبکہ مجھ پر اس کی حقیقت واضح ہو چکی ہے، میں گواہی دیتا ہوں کہ وہ اللہ کے رسول ہیں اور جو وہ کہتے ہیں حق ہے، اللہ کی قسم میں اس سے پیچھے نہیں ہٹوں گا، اگر تم سچے ہو تو مجھے روک کر دکھاؤ“، ابوجہل نے کہا: ”ابوعمارہ کو چھوڑ دو، کیونکہ میں نے ان کے بھتیجے کو بہت ہی بری گالیاں دی تھیں“، پس حمزہ اپنے اسلام پر قائم رہے اور رسول اللہ صلی اللہ علیہ وسلم کی اتباع کر لی، جب حمزہ اسلام لائے تو قریش کو معلوم ہو گیا کہ اب رسول اللہ صلی اللہ علیہ وسلم کو قوت حاصل ہو گئی ہے اور حمزہ ان کا دفاع کریں گے، چنانچہ انہوں نے آپ صلی اللہ علیہ وسلم کو پہنچائی جانے والی بعض تکالیف سے ہاتھ روک لیا، پھر حمزہ گھر واپس آئے تو شیطان ان کے پاس آیا اور وسوسہ ڈالا کہ تم قریش کے سردار ہو کر اس صابی کے پیچھے لگ گئے اور باپ دادا کا دین چھوڑ دیا؟ اس سے تو موت بہتر ہے، پس حمزہ پریشان ہو گئے اور دعا کی: «اللَّهُمَّ إِنْ كَانَ رَشَدًا فَاجْعَلْ تَصْدِيقَهُ فِي قَلْبِي، وَإِلَّا فَاجْعَلْ لِي مِمَّا وَقَعْتُ فِيهِ مَخْرَجًا» ”اے اللہ! اگر یہ ہدایت ہے تو میرے دل میں اس کی تصدیق ڈال دے، ورنہ جس الجھن میں میں پڑ گیا ہوں اس سے میرے لیے کوئی راستہ بنا دے“، انہوں نے وہ رات سخت وسوسوں میں گزاری یہاں تک کہ صبح ہوئی تو رسول اللہ صلی اللہ علیہ وسلم کی خدمت میں حاضر ہوئے اور عرض کیا: ”اے بھتیجے! میں ایک ایسی الجھن میں پڑ گیا ہوں جس سے نکلنے کا راستہ نہیں جانتا، میرے جیسے شخص کا ایسی حالت میں رہنا بہت مشکل ہے کہ اسے معلوم نہ ہو کہ وہ ہدایت پر ہے یا گمراہی پر، لہٰذا مجھ سے کچھ گفتگو فرمائیں“، پس رسول اللہ صلی اللہ علیہ وسلم ان کی طرف متوجہ ہوئے، انہیں نصیحت کی، اللہ کا خوف دلایا اور خوشخبری سنائی، چنانچہ اللہ نے ان کے دل میں ایمان ڈال دیا اور انہوں نے عرض کیا: ”میں گواہی دیتا ہوں کہ آپ سچے ہیں، میں سچی اور معرفت والی گواہی دیتا ہوں، اے میرے بھتیجے! اب آپ اپنے دین کا کھل کر اظہار کریں، اللہ کی قسم مجھے یہ پسند نہیں کہ آسمان کے سائے تلے جو کچھ ہے وہ مجھے مل جائے اور میں اپنے پہلے دین پر رہوں“، پس حمزہ ان لوگوں میں سے تھے جن کے ذریعے اللہ نے دین کو عزت بخشی۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4939]