سیدنا زید بن ثابت رضی اللہ عنہ فرماتے ہیں: رسول اللہ صلی اللہ علیہ وسلم نے غزوہ احد کے دن مجھے سیدنا سعد بن الربیع رضی اللہ عنہ کو ڈھونڈنے بھیجا، اور مجھے فرمایا: اگر تم ان کو دیکھو تو میرا سلام کہنا اور ان سے کہنا: رسول اللہ صلی اللہ علیہ وسلم تجھے فرما رہے ہیں کہ تم نے اپنے آپ کو کیسا پایا؟ سیدنا زید رضی اللہ عنہ فرماتے ہیں: میں ان کو شہداء میں ڈھونڈنے لگ گیا، بالآخر میں نے ان کو دیکھ لیا، اس وقت وہ زندگی کی آخری سانسیں لے رہے تھے، ان پر نیزوں، تلواروں اور تیروں کے ستر زخم موجود تھے، میں نے ان سے کہا: اے سعد! تجھے رسول اللہ صلی اللہ علیہ وسلم نے سلام بھیجا ہے۔ اور فرمایا ہے کہ مجھے اپنی کیفیت بتاؤ۔ سیدنا سعد رضی اللہ عنہ نے کہا: رسول اللہ صلی اللہ علیہ وسلم پر اور تم پر سلامی ہو، آپ صلی اللہ علیہ وسلم سے کہہ دینا ” یا رسول اللہ صلی اللہ علیہ وسلم میں جنت کی خوشبو محسوس کر رہا ہوں اور میری انصار قوم سے کہہ دینا ” تمہارے لئے اللہ تعالیٰ کی بارگاہ میں رسول اللہ صلی اللہ علیہ وسلم کو تنہا چھوڑنے کا کوئی عذر نہیں ہو گا جب تک کہ تمہاری پلکیں ہل رہی ہیں۔ آپ فرماتے ہیں: اس کے بعد ان کی روح پرواز کر گئی۔ اللہ تعالیٰ ان پر کروڑوں رحمتیں نازل فرمائے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4967]