سیدنا عبداللہ بن محمد بن عمر بن علی اپنے والد سے، وہ ان کے دادا سے روایت کرتے ہیں کہ سیدنا جعفر بن ابی طالب رضی اللہ عنہ کو ایک رومی شخص نے ضرب لگائی اور آپ کو دو حصوں میں کاٹ ڈالا، ان کے جسم کا ایک حصہ انگور کی ایک بیل سے ملا، آپ کے اس نصف حصے پر تیس سے زیادہ زخم لگے ہوئے تھے، آپ نے دوسرے مرحلے پر حبشہ کی جانب ہجرت کی، اس وقت ان کے ہمراہ ان کی زوجہ حضرات اسماء بنت عمیس رضی اللہ عنہا بھی تھیں، آپ رسول اللہ صلی اللہ علیہ وسلم کے مدینہ کی جانب ہجرت کرنے تک حبشہ میں ہی رہے، حضور صلی اللہ علیہ وسلم کی ہجرت کے بعد انہوں نے غزوہ خیبر کے موقع پر مدینہ منورہ کی جانب ہجرت کی، (ان کی ہجرت پر) رسول اللہ صلی اللہ علیہ وسلم نے فرمایا: میں نہیں جانتا کہ فتح خیبر کی مجھے زیادہ خوشی ہوئی ہے یا سیدنا جعفر ابن ابی طالب رضی اللہ عنہ کی ہجرت کی۔ سیدنا جعفر رضی اللہ عنہ کی کنیت ابوعبداللہ تھی۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4995]