محمد بن عمر سے روایت ہے کہ ابوالعاص بن ربیع بن عبدالعزیٰ بن عبد شمس بن عبدمناف بن قصی، ان کا نام مقسم تھا، ان کی والدہ ہالہ بنت خویلد بن اسد بن عبدالعزیٰ بن قصی تھیں، اور ان کی خالہ سیدہ خدیجہ بنت خویلد رضی اللہ عنہا نبی صلی اللہ علیہ وسلم کی زوجہ تھیں، رسول اللہ صلی اللہ علیہ وسلم نے اسلام سے قبل اپنی صاحبزادی سیدہ زینب رضی اللہ عنہا کا نکاح ان سے کر دیا تھا، ان کے ہاں علی اور امامہ پیدا ہوئے، علی کا انتقال بچپن میں ہو گیا تھا جبکہ امامہ زندہ رہیں یہاں تک کہ سیدہ فاطمہ رضی اللہ عنہا کی وفات کے بعد سیدنا علی بن ابی طالب رضی اللہ عنہ نے ان سے نکاح کیا۔ ابوالعاص ان لوگوں میں شامل تھے جو مشرکین کی طرف سے غزوہ بدر میں شریک ہوئے اور انہیں سیدنا عبداللہ بن جبیر بن نعمان انصاری رضی اللہ عنہ نے قیدی بنایا تھا، پھر جب اہل مکہ نے اپنے قیدیوں کے فدیہ کے لیے مال بھیجا تو ابوالعاص کے فدیہ کے لیے ان کے بھائی عمرو بن ربیع آئے۔ میں نے گزشتہ ابواب میں ان کے اور رسول اللہ صلی اللہ علیہ وسلم کی صاحبزادی سیدہ زینب رضی اللہ عنہا کے درمیان پیش آنے والے واقعات کا ذکر کیا ہے یہاں تک کہ سیدہ زینب رضی اللہ عنہا کی وفات ہو گئی، اب آپ ابوالعاص کے بہتر انجام، ان کے حسنِ اسلام اور مدینہ منورہ کی طرف ہجرت کا حال سماعت کریں یہاں تک کہ ان کی وفات رسول اللہ صلی اللہ علیہ وسلم کی موجودگی میں ہوئی۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5108]