محمد بن عمر نے سیدنا ابوالعاص رضی اللہ عنہ کا نسب یوں بیان کیا ہے ” ابوالعاص بن ربیع بن عبدالعزی بن عبدشمس بن عبد مناف بن قصی “ ابوالعاص کا نام ” مقسم “ ہے، اور ان کی والدہ ” ہالہ بنت خویلد بن اسد بن عبدالعزی بن قصی “ ہیں، ان کی خالہ ” ام المومنین سیدہ خدیجہ بنت خویلد رضی اللہ عنہا ہیں، نبی اکرم صلی اللہ علیہ وسلم نے اسلام آنے سے پہلے اپنی بیٹی سیدہ زینب رضی اللہ عنہا کا نکاح ان کے ساتھ کیا تھا، ان کے ہاں علی اور امامہ پیدا ہوئے، ان میں سے علی بچپن ہی میں فوت ہو گئے اور سیدنا امامہ زندہ رہیں اور سیدہ فاطمۃ الزہراء رضی اللہ عنہا کے انتقال کے بعد سیدنا علی رضی اللہ عنہ نے ان کے ساتھ نکاح کیا تھا، ابوالعاص رضی اللہ عنہ جنگ بدر میں مشرکین کی جانب سے شریک ہوئے تھے، سیدنا عبداللہ بن جبیر بن نعمان انصاری رضی اللہ عنہ نے ان کو گرفتار کر لیا تھا، پھر جب اہل مکہ نے اپنے قیدیوں کے فدیے بھیجے، تو سیدہ زینب رضی اللہ عنہا نے ان کے بھائی عمرو بن الربیع کے ہاتھوں ابوالعاص رضی اللہ عنہ فدیہ بھیجا۔ سیدنا ابوالعاص رضی اللہ عنہ اور زینب بنت رسول اللہ صلی اللہ علیہ وسلم کے درمیان، سیدہ زینب رضی اللہ عنہا کی شہادت تک کے تمام معاملات کا ذکر کر دیا گیا ہے، اب سیدنا ابوالعاص رضی اللہ عنہ کے حسن خاتمہ، قبول اسلام اور مدینہ منورہ میں منتقل ہونے اور رسول اللہ صلی اللہ علیہ وسلم کے پاس وفات پانے کا تذکرہ کیا جا رہا ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5108]