سیدنا انس رضی اللہ عنہ سے روایت ہے کہ جب رسول اللہ صلی اللہ علیہ وسلم کو ابوسفیان کے (تجارتی قافلے کی) آمد کی خبر پہنچی تو سیدنا ابوبکر رضی اللہ عنہ نے کلام کیا لیکن آپ صلی اللہ علیہ وسلم نے ان سے اعراض فرمایا، پھر سیدنا عمر رضی اللہ عنہ نے کلام کیا تو آپ صلی اللہ علیہ وسلم نے ان سے بھی اعراض فرمایا، تب سیدنا سعد بن عبادہ رضی اللہ عنہ نے عرض کیا: ”یا رسول اللہ! اس ذات کی قسم جس کے قبضہ قدرت میں میری جان ہے، اگر آپ ہمیں سمندر میں کود جانے کا حکم دیں گے تو ہم اس میں کود جائیں گے، اور اگر آپ ہمیں حکم دیں کہ ہم سواریوں کے سینوں کو مارتے ہوئے (تیزی کے ساتھ) ”برک الغماد“ (انتہائی دور دراز مقام) تک لے جائیں تو ہم ضرور ایسا کریں گے“، چنانچہ رسول اللہ صلی اللہ علیہ وسلم نے لوگوں کو (تیاری کے لیے) پکارا اور وہ سب روانہ ہوئے یہاں تک کہ بدر کے مقام پر پڑاؤ کیا۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5183]