سیدنا ابو موسیٰ اشعری رضی اللہ عنہ سے روایت ہے کہ علاء بن حضرمی نے رسول اللہ صلی اللہ علیہ وسلم کی خدمت میں بحرین سے اسی ہزار (درہم یا دینار کی خطیر رقم) بھیجی، رسول اللہ صلی اللہ علیہ وسلم کے پاس اس سے پہلے یا اس کے بعد کبھی اس سے زیادہ مال نہیں آیا۔ آپ صلی اللہ علیہ وسلم نے حکم دیا تو اسے ایک چٹائی پر بکھیر دیا گیا۔ پھر نماز کی اذان دی گئی، تو رسول اللہ صلی اللہ علیہ وسلم تشریف لائے اور کھڑے ہو کر اس مال کی طرف متوجہ ہوئے۔ لوگ آتے گئے اور آپ صلی اللہ علیہ وسلم انہیں عطا فرماتے رہے۔ اس دن نہ کوئی گنتی تھی اور نہ کوئی وزن، بس مٹھیاں بھر بھر کر دیا جا رہا تھا۔ اسی دوران سیدنا عباس رضی اللہ عنہ آئے اور عرض کیا: ”اے اللہ کے رسول! میں نے جنگ بدر کے دن اپنا اور عقیل کا فدیہ ادا کیا تھا، اور عقیل کے پاس مال نہیں تھا، لہٰذا مجھے اس مال میں سے عطا فرمائیں۔“ رسول اللہ صلی اللہ علیہ وسلم نے فرمایا: ”لے لیں۔“ تو انہوں نے اپنی اونی چادر میں لپ بھر لیے۔ پھر وہ جانے کے لیے مڑے لیکن (بوجھ زیادہ ہونے کی وجہ سے اسے اٹھا) نہ سکے، تو انہوں نے اپنا سر رسول اللہ صلی اللہ علیہ وسلم کی طرف اٹھایا اور عرض کیا: ”اے اللہ کے رسول! اسے مجھ پر اٹھوا دیجیے۔“ یہ سن کر رسول اللہ صلی اللہ علیہ وسلم مسکرا دیے۔ سیدنا عباس رضی اللہ عنہ (اس وقت) کہہ رہے تھے: ”اللہ تعالیٰ نے جو وعدے کیے تھے، ان میں سے ایک تو پورا ہو گیا، اور دوسرے کا مجھے علم نہیں، (اللہ تعالیٰ کا فرمان ہے:) ﴿قُلْ لِمَنْ فِي أَيْدِيكُمْ مِنَ الْأَسْرَى إِنْ يَعْلَمِ اللَّهُ فِي قُلُوبِكُمْ خَيْرًا يُؤْتِكُمْ خَيْرًا مِمَّا أُخِذَ مِنْكُمْ وَيَغْفِرْ لَكُمْ﴾ ”(اے نبی!) آپ کے قبضے میں جو قیدی ہیں، ان سے کہہ دیجیے کہ اگر اللہ نے تمہارے دلوں میں کوئی بھلائی جان لی، تو وہ تمہیں اس (مال) سے بہتر عطا فرمائے گا جو تم سے لیا گیا ہے، اور تمہیں بخش دے گا۔“ [سورة الأنفال: 70] یہ مال یقیناً اس سے بہتر ہے جو مجھ سے لیا گیا تھا، اور مجھے نہیں معلوم کہ مغفرت کے معاملے میں میرے ساتھ کیا کیا جائے گا۔“ [المستدرك على الصحيحين/كتاب معرفة الصحابة رضي الله تعالى عنهم/حدیث: 5510]