مالک بن مرثد اپنے والد کا یہ بیان نقل کرتے ہیں کہ سیدنا ابوذر رضی اللہ عنہ فرماتے ہیں کہ رسول اللہ نے ارشاد فرمایا: زمین و آسمان نے ابوذر رضی اللہ عنہ سے بڑھ کر زیادہ سچے لہجے والا اور وعدہ وفائی کرنے والا شخص کبھی نہیں دیکھا، یہ سیدنا عیسیٰ ابن مریم علیہما السلام سے مشابہت رکھتے ہیں۔ سیدنا عمر بن خطاب رضی اللہ عنہ اٹھ کر کھڑے ہوئے اور عرض کیا: یا رسول اللہ صلی اللہ علیہ وسلم کیا ہم فضیلت سے ابوذر رضی اللہ عنہ کو آگاہ کر دیں؟ آپ صلی اللہ علیہ وسلم نے فرمایا: ٹھیک ہے، تم اس کو آگاہ کر دو۔ یہ حدیث امام مسلم رحمۃ اللہ علیہ کے معیار کے مطابق ہے لیکن شیخین رحمۃ اللہ علیہما نے اس کو نقل نہیں کیا۔ یہی حدیث سیدنا عبداللہ بن عمرو اور ابوالدرداء سے بھی مروی ہے۔ سیدنا عبداللہ بن عمرو رضی اللہ عنہ سے مروی حدیث درج ذیل ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5550]