محمد بن عمر سے روایت ہے کہ سیدنا محمد بن مسلمہ رضی اللہ عنہ کا انتقال مدینہ منورہ میں سن 46 ہجری میں ہوا، وہ اس وقت ستتر سال کے تھے اور آپ طویل القامت (دراز قد) اور سر سے گنجے تھے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5948]

ابن عمر رضی اللہ عنہما سے روایت ہے کہ سیدنا محمد بن مسلمہ رضی اللہ عنہ کی کنیت ”ابو عبد الرحمن“ تھی، آپ مدینہ منورہ میں سیدنا اسید بن حضیر اور سیدنا سعد بن معاذ رضی اللہ عنہما سے بھی پہلے سیدنا مصعب بن عمیر رضی اللہ عنہ کے ہاتھ پر اسلام لائے تھے، رسول اللہ صلی اللہ علیہ وسلم نے ان کے اور سیدنا ابو عبیدہ بن جراح رضی اللہ عنہ کے درمیان بھائی چارہ (مواخات) قائم فرمایا تھا، وہ غزوۂ بدر اور احد میں شریک ہوئے اور احد کے دن ان لوگوں میں شامل تھے جو لوگوں کے پیچھے ہٹ جانے کے باوجود رسول اللہ صلی اللہ علیہ وسلم کے ساتھ ثابت قدم رہے، آپ غزوۂ خندق اور رسول اللہ صلی اللہ علیہ وسلم کے ساتھ تمام غزوات میں شریک رہے سوائے غزوۂ تبوک کے، کیونکہ رسول اللہ صلی اللہ علیہ وسلم نے تبوک کی روانگی کے وقت انہیں مدینہ منورہ میں اپنا نائب مقرر فرمایا تھا، اور آپ کعب بن اشرف کو قتل کرنے والوں میں بھی شامل تھے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5948M]