سیدنا بریدہ اسلمی رضی اللہ عنہ سے روایت ہے کہ جب رسول اللہ صلی اللہ علیہ وسلم اہل خیبر کے سامنے قیام فرما تھے تو آپ صلی اللہ علیہ وسلم نے ارشاد فرمایا: ”کل میں یہ جھنڈا اس شخص کو دوں گا جو اللہ اور اس کے رسول سے محبت کرتا ہے اور اللہ اور اس کا رسول بھی اس سے محبت کرتے ہیں“، جب اگلا دن ہوا تو صحابہ کی ایک جماعت اس امید میں گردنیں اٹھا کر دیکھنے لگی، پھر آپ صلی اللہ علیہ وسلم نے سیدنا علی رضی اللہ عنہ کو بلایا جبکہ ان کی آنکھیں دکھ رہی تھیں، آپ صلی اللہ علیہ وسلم نے ان کی آنکھوں میں اپنا لعابِ دہن لگایا اور انہیں جھنڈا عطا فرما دیا، لوگ ان کے ساتھ آگے بڑھے اور اہل خیبر سے آمنا سامنا ہوا، وہاں مرحب رجزیہ اشعار پڑھتا ہوا نکلا اور کہہ رہا تھا: ”خیبر جانتا ہے کہ میں مرحب ہوں... اسلحہ پوش، ایک تجربہ کار بہادر ہوں، جب تلواریں شعلوں کی طرح لپکتی ہوئی آتی ہیں... تو میں کبھی نیزہ مارتا ہوں اور کبھی وار کرتا ہوں“، پھر اس کا اور علی رضی اللہ عنہ کا آمنا سامنا ہوا اور دو دو وار ہوئے، علی رضی اللہ عنہ نے اس کے سر پر ایسی ضرب لگائی کہ تلوار اس کے ڈاڑھوں تک اتر گئی، لشکر والوں نے اس ضرب کی آواز سنی، اور آپ نے اسے قتل کر دیا، پس ابھی آخری لوگ پہنچے ہی نہ تھے کہ پہلے لوگوں کے لیے فتح حاصل ہو چکی تھی۔
یہ ایک عظیم باب ہے جسے میں نے ابواب میں تفصیل سے بیان کیا ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5956]