سیدنا جابر بن عبداللہ رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”اس خبیث مرحب کے شر کو ختم کرنے کی ذمہ داری کون لیتا ہے؟“ تو سیدنا محمد بن مسلمہ رضی اللہ عنہ نے عرض کی: یا رسول اللہ! میں حاضر ہوں، آپ صلی اللہ علیہ وسلم نے فرمایا: ”جاؤ اس کی طرف، اے اللہ! اس کی مدد فرما“، چنانچہ محمد بن مسلمہ کھڑے ہو گئے۔ جابر رضی اللہ عنہ کہتے ہیں: اللہ کی قسم! میں نے ان جیسے دو آدمیوں کے درمیان کبھی ایسی جنگ نہیں دیکھی جیسی وہاں ہوئی؛ جب وہ دونوں ایک دوسرے کے قریب ہوئے تو ان کے درمیان ایک درخت آگیا، ان میں سے ایک دوسرے سے بچنے کے لیے اس درخت کی اوٹ لینے لگا، جب بھی ایک شخص اوجھل ہوتا تو دوسرا اس کے پیچھے پہنچ جاتا، وہ دونوں اپنی تلواروں سے ایک دوسرے پر پے در پے وار کر رہے تھے، پھر محمد بن مسلمہ نے اپنی ڈھال پر اس کی تلوار کا وار روکا تو اس کی تلوار ڈھال میں دھنس گئی اور مرحب اسے نکالنے میں ناکام رہا، تب محمد بن مسلمہ نے اسے ضرب لگائی اور اسے قتل کر دیا۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا، حالانکہ کثیر اسناد کے ساتھ ایسی متواتر خبریں موجود ہیں کہ مرحب کا قاتل امیر المؤمنین علی بن ابی طالب رضی اللہ عنہ کو قرار دیا گیا ہے، جن میں سے ایک یہ ہے: [المستدرك على الصحيحين/كتاب معرفة الصحابة رضي الله تعالى عنهم/حدیث: 5955]