حسن بصری سے روایت ہے کہ زیاد نے سیدنا حکم بن عمرو غفاری رضی اللہ عنہ کو ایک لشکر کا امیر بنا کر بھیجا، تو سیدنا عمران بن حصین رضی اللہ عنہ انہیں دار الامارت میں لوگوں کے درمیان ملے اور پوچھا: ”کیا تم جانتے ہو میں تمہارے پاس کیوں آیا ہوں؟ کیا تمہیں یاد ہے کہ جب رسول اللہ صلی اللہ علیہ وسلم کو اس شخص کی اطلاع ملی جس کے امیر نے اسے آگ میں کودنے کا حکم دیا تھا اور وہ شخص کودنے کے لیے کھڑا ہو گیا تو لوگوں نے اسے پکڑ لیا؟ تب رسول اللہ صلی اللہ علیہ وسلم نے فرمایا تھا: ”اگر وہ اس میں کود جاتا تو وہ دونوں (امیر اور مامور) آگ میں داخل ہوتے، اللہ کی نافرمانی میں (کسی کی) اطاعت جائز نہیں““، حکم رضی اللہ عنہ نے کہا: ”جی ہاں (مجھے یاد ہے)“، عمران رضی اللہ عنہ نے فرمایا: ”میں نے صرف تمہیں یہ حدیث یاد دلانے کا ارادہ کیا تھا۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5983]