بنو نوفل کے مولیٰ ابوالحسن سے روایت ہے کہ جب سورۃ الشعراء کی یہ آیت ﴿وَالشُّعَرَاءُ يَتَّبِعُهُمُ الْغَاوُونَ﴾ [سورة الشعراء: 224] ”اور شاعروں کی پیروی تو بہکے ہوئے لوگ کرتے ہیں“ نازل ہوئی تو سیدنا عبداللہ بن رواحہ اور سیدنا حسان بن ثابت رضی اللہ عنہما روتے ہوئے رسول اللہ صلی اللہ علیہ وسلم کی خدمت میں حاضر ہوئے، آپ صلی اللہ علیہ وسلم ان کے سامنے تلاوت فرما رہے تھے یہاں تک کہ جب آپ صلی اللہ علیہ وسلم اس حصے پر پہنچے ﴿إِلَّا الَّذِينَ آمَنُوا وَعَمِلُوا الصَّالِحَاتِ﴾ ”سوائے ان لوگوں کے جو ایمان لائے اور انہوں نے نیک عمل کیے“ تو آپ صلی اللہ علیہ وسلم نے فرمایا: ”اس سے مراد تم لوگ ہو،“ پھر جب پڑھا ﴿وَذَكَرُوا اللَّهَ كَثِيرًا﴾ ”اور جنہوں نے اللہ کو کثرت سے یاد کیا“ تو فرمایا: ”اس سے مراد تم ہو،“ اور جب پڑھا ﴿وَانتَصَرُوا مِن بَعْدِ مَا ظُلِمُوا﴾ ”اور جنہوں نے اپنے اوپر ظلم کیے جانے کے بعد (حق کی خاطر) بدلہ لیا“ تو فرمایا: ”اس سے مراد بھی تم ہی ہو۔“ [سورة الشعراء: 227] [المستدرك على الصحيحين/كتاب معرفة الصحابة رضي الله تعالى عنهم/حدیث: 6179]