ام المومنین سیدہ عائشہ رضی اللہ عنہا فرماتی ہیں کہ سیدنا حسان بن ثابت رضی اللہ عنہ نے رسول اللہ صلی اللہ علیہ وسلم سے مشرکین کی ہجو کرنے کی اجازت مانگی، تو رسول اللہ صلی اللہ علیہ وسلم نے فرمایا: تم ان کی ہجو کیسے کرو گے؟ کیونکہ خود میرا نسب بھی تو انہیں میں ملتا ہے؟ تو سیدنا حسان بن ثابت رضی اللہ عنہ نے عرض کی: حضور صلی اللہ علیہ وسلم میں آپ کو اس ہجو سے یوں نکال لوں گا جیسے مکھن سے بال نکالا جاتا ہے۔ ہشام کہتے ہیں: میں ام المومنین کے پاس حسان کی برائی کرنے لگا تو ام المومنین نے مجھے ان کی برائی کرنے سے منع کر دیا اور فرمایا: وہ رسول اللہ صلی اللہ علیہ وسلم کا دفاع کیا کرتا تھا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس حدیث کو اس طرح نقل نہیں کیا۔ امام مسلم رحمۃ اللہ علیہ نے لیث کی خالد بن یزید کی سند کے ہمراہ مفصل حدیث بیان کی ہے اور اس میں مفصل قصیدہ بھی موجود ہے۔ جس قصیدے کا ایک شعر یہ بھی ہے۔ تو نے محمد صلی اللہ علیہ وسلم کی برائی کی ہے، میں نے اس کا جواب دیا ہے اور اللہ تعالیٰ کی بارگاہ میں اس کا بہترین اجر ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6178]

بنی نوفل کے آزاد کردہ غلام ابوالحسن فرماتے ہیں کہ جب سورۃ شعراء نازل ہوئی تو سیدنا عبداللہ بن رواحہ رضی اللہ عنہ اور سیدنا حسان بن ثابت رضی اللہ عنہ رسول اللہ صلی اللہ علیہ وسلم کی بارگاہ میں روتے ہوئے حاضر ہوئے، اس وقت رسول اللہ صلی اللہ علیہ وسلم یہ آیات تلاوت کر رہے تھے: وَالشُّعَرَاءُ يَتَّبِعُهُمُ الْغَاوُونَ أَلَمْ تَرَ أَنَّهُمْ فِي كُلِّ وَادٍ يَهِيمُونَ وَأَنَّهُمْ يَقُولُونَ مَا لَا يَفْعَلُونَ إِلَّا الَّذِينَ آمَنُوا وَعَمِلُوا الصَّالِحَاتِ وَذَكَرُوا اللَّهَ كَثِيرًا وَانْتَصَرُوا مِنْ بَعْدِ مَا ظُلِمُوا وَسَيَعْلَمُ الَّذِينَ ظَلَمُوا أَيَّ مُنْقَلَبٍ يَنْقَلِبُونَ (الشعراء 24 تا 27) جب رسول اللہ صلی اللہ علیہ وسلم آیت میں وعملوا الصالحات کے الفاظ پر پہنچے تو فرمایا: (اس سے مراد) تم لوگ (ہو)۔ اور جب و ذکرو اللہ کثیرا کے الفاظ پر پہنچے تو پھر فرمایا (اس سے مراد) تم لوگ (ہو) پھر جب وانتصروا من بعد ما ظلموا پر پہنچے تو پھر فرمایا: (اس سے مراد) تم لوگ (ہو)۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6179]