سیدنا براء بن عازب رضی اللہ عنہ سے روایت ہے کہ رسول اللہ صلی اللہ علیہ وسلم کی خدمت میں عرض کیا گیا: یا رسول اللہ! بے شک ابو سفیان بن حارث بن عبدالمطلب آپ کی ہجو (برائی) کرتا ہے، تو سیدنا ابن رواحہ رضی اللہ عنہ کھڑے ہوئے اور عرض کیا: ”یا رسول اللہ! مجھے اس کی ہجو کرنے کی اجازت عطا فرمائیں،“ آپ صلی اللہ علیہ وسلم نے فرمایا: ”کیا تم وہی ہو جس نے یہ کہا تھا کہ اللہ ثابت قدم رکھے؟“ انہوں نے عرض کیا: جی ہاں، میں نے کہا تھا: «يُثبِّتُ اللهُ مَا أَعْطَاكَ مِنْ حَسَنٍ … تَثْبِيتَ مُوسَى وَنَصْرًا مِثْلَ مَا نُصِرَا» ”اللہ تعالیٰ نے آپ کو جو حسن و خوبی عطا فرمائی ہے اسے اسی طرح ثبات عطا کرے جیسے موسیٰ علیہ السلام کو ثبات دیا اور آپ کی ایسی ہی مدد فرمائے جیسی ان کی کی گئی تھی،“ آپ صلی اللہ علیہ وسلم نے فرمایا: ”اور اللہ تمہارے ساتھ بھی ویسا ہی بھلائی والا معاملہ فرمائے۔“ پھر سیدنا کعب رضی اللہ عنہ اٹھے اور عرض کیا: ”یا رسول اللہ! مجھے اس کی ہجو کرنے کی اجازت دیں،“ آپ صلی اللہ علیہ وسلم نے فرمایا: ”کیا تم وہی ہو جس نے کہا تھا: «هَمَّتْ» ؟“ انہوں نے عرض کیا: جی ہاں یا رسول اللہ: «هَمَّتْ سَخِينةُ أَنْ تُغَالِبَ رَبَّهَا … فَلَيُغلَبَنَّ مُغَالِبُ الغُلَّابِ» ”قبیلہ قریش نے اپنے رب پر غالب آنے کا ارادہ کیا، تو مغلوب کر دیا جائے گا وہ جو تمام غالب آنے والوں پر غالب آنے والے (اللہ) کا مقابلہ کرنا چاہے۔“ آپ صلی اللہ علیہ وسلم نے فرمایا: ”آگاہ رہو کہ اللہ تمہاری اس بات کو نہیں بھولا۔“ پھر سیدنا حسان رضی اللہ عنہ اٹھے اور عرض کیا: ”یا رسول اللہ! مجھے اجازت دیں،“ اور انہوں نے اپنی سیاہ زبان نکال کر دکھائی اور عرض کیا: ”یا رسول اللہ! مجھے اجازت دیں، اگر آپ چاہیں تو میں اپنی زبان سے ان کی آبرو کے مشکیزوں کو پھاڑ ڈالوں،“ تو آپ صلی اللہ علیہ وسلم نے فرمایا: ”تم ابوبکر کے پاس جاؤ تاکہ وہ تمہیں اس قوم کی تاریخ، ان کے ایام اور ان کے حسب و نسب سے آگاہ کریں، پھر تم ان کی ہجو کرو اور جبرائیل تمہارے ساتھ ہوں گے۔“
یہ حدیث صحیح الاسناد ہے، لیکن شیخین نے اسے ان الفاظ کے ساتھ روایت نہیں کیا، البتہ امام مسلم نے اسے خالد بن یزید کی روایت سے طویل نقل کیا ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6180]