حویطب بن عبدالعزیٰ رضی اللہ عنہ بیان کرتے ہیں: جب رسول اللہ صلی اللہ علیہ وسلم فتح مکہ کے سال مکہ میں داخل ہوئے تو میں سخت خوفزدہ ہو گیا اور اپنا گھر چھوڑ کر نکل کھڑا ہوا۔ میں نے اپنے اہل و عیال کو بھی مختلف محفوظ مقامات پر چھپا دیا، پھر میں خود ’حائطِ عوف‘ (ایک باغ) میں جا چھپا۔ وہاں میری ملاقات سیدنا ابوذر غفاری رضی اللہ عنہ سے ہوئی، میرے اور ان کے درمیان پرانی دوستی تھی اور دوستی ہمیشہ (شر سے) بچاؤ کا ذریعہ ہوتی ہے۔ جب میں نے انہیں دیکھا تو (ڈر کر) بھاگنے لگا، انہوں نے آواز دی: اے ابو محمد! میں نے کہا: لبیک۔ انہوں نے پوچھا: تمہیں کیا ہوا؟ میں نے کہا: خوف (ستائے جا رہا ہے)۔ انہوں نے فرمایا: تم پر کوئی خوف نہیں، تم اللہ عزوجل کی امان میں ہو۔ چنانچہ میں ان کے پاس واپس آ گیا اور انہیں سلام کیا۔ انہوں نے فرمایا: اپنے گھر چلے جاؤ۔ میں نے کہا: کیا میرے لیے اپنے گھر جانے کا کوئی راستہ ہے؟ اللہ کی قسم! مجھے نہیں لگتا کہ میں اپنے گھر تک زندہ پہنچ پاؤں گا، اس سے پہلے ہی میں پکڑ کر قتل کر دیا جاؤں گا یا میرے گھر میں داخل ہو کر مجھے مار دیا جائے گا، جبکہ میرے اہل و عیال بھی مختلف جگہوں پر بکھرے ہوئے ہیں۔ ابوذر رضی اللہ عنہ نے فرمایا: تم اپنے اہل و عیال کو ایک جگہ جمع کرو، میں تمہارے ساتھ تمہارے گھر تک چلتا ہوں۔ چنانچہ وہ میرے ساتھ گھر تک آئے اور راستے بھر اعلان کرتے رہے کہ "حویطب کو امان حاصل ہے، اسے کوئی تنگ نہ کرے"۔ پھر ابوذر رضی اللہ عنہ رسول اللہ صلی اللہ علیہ وسلم کی بارگاہ میں حاضر ہوئے اور آپ صلی اللہ علیہ وسلم کو مطلع کیا، تو آپ صلی اللہ علیہ وسلم نے فرمایا: ”کیا میں نے ان لوگوں کے علاوہ جن کے قتل کا حکم دیا تھا، تمام لوگوں کو امان نہیں دے دی تھی؟“۔ حویطب کہتے ہیں: تب مجھے اطمینان ہوا اور میں نے اپنے اہل و عیال کو گھر واپس بلا لیا۔ پھر ابوذر رضی اللہ عنہ میرے پاس آئے اور فرمایا: اے ابو محمد! آخر کب تک (حق سے دور رہو گے)؟ تم تمام اہم مواقع پر پیچھے رہ گئے اور بہت سی خیر سے محروم رہے، ابھی بھی بہت سی خیر باقی ہے، لہذا رسول اللہ صلی اللہ علیہ وسلم کی خدمت میں حاضر ہو کر اسلام لے آؤ، سلامتی پا جاؤ گے۔ رسول اللہ صلی اللہ علیہ وسلم تمام لوگوں سے بڑھ کر نیک، صلہ رحمی کرنے والے اور بردبار ہیں، آپ صلی اللہ علیہ وسلم کا شرف تمہارا ہی شرف ہے اور آپ صلی اللہ علیہ وسلم کی عزت تمہاری ہی عزت ہے۔ میں نے کہا: میں آپ کے ساتھ چل کر آپ صلی اللہ علیہ وسلم کی خدمت میں حاضر ہوتا ہوں۔ چنانچہ میں ان کے ساتھ نکلا اور بطحاء کے مقام پر رسول اللہ صلی اللہ علیہ وسلم کی خدمت میں حاضر ہوا، اس وقت آپ صلی اللہ علیہ وسلم کے پاس ابوبکر اور عمر رضی اللہ عنہما بھی موجود تھے۔ میں آپ صلی اللہ علیہ وسلم کے سرہانے کھڑا ہوا اور ابوذر سے پوچھا کہ سلام کیسے کرنا ہے؟ انہوں نے کہا: یوں کہو "السلام علیک ایھا النبی ورحمۃ اللہ وبرکاتہ"۔ میں نے یہی کہا تو آپ صلی اللہ علیہ وسلم نے فرمایا: ”وعلیک السلام حویطب“۔ پھر میں نے کلمہ شہادت پڑھا: میں گواہی دیتا ہوں کہ اللہ کے سوا کوئی معبود نہیں اور آپ اللہ کے رسول ہیں۔ تو رسول اللہ صلی اللہ علیہ وسلم نے فرمایا: ”تمام تعریفیں اللہ کے لیے ہیں جس نے تمہیں ہدایت دی“۔ حویطب کہتے ہیں: رسول اللہ صلی اللہ علیہ وسلم میرے اسلام لانے پر بہت خوش ہوئے، آپ صلی اللہ علیہ وسلم نے مجھ سے کچھ مال قرض مانگا تو میں نے آپ صلی اللہ علیہ وسلم کو چالیس ہزار درہم قرض دیے۔ میں غزوہ حنین اور طائف میں آپ صلی اللہ علیہ وسلم کے ساتھ شریک ہوا اور آپ صلی اللہ علیہ وسلم نے مجھے حنین کے مالِ غنیمت میں سے سو اونٹ عطا فرمائے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6202]