سیدنا ابن عباس رضی اللہ عنہما سے روایت ہے کہ سیدنا عمر بن خطاب رضی اللہ عنہ جب رسول اللہ صلی اللہ علیہ وسلم کے بزرگ صحابہ کو دعوت دیتے تو مجھے بھی ان کے ساتھ بلا لیتے تھے، ایک دن —یا ایک رات— انہوں نے ہمیں بلا کر فرمایا: ”رسول اللہ صلی اللہ علیہ وسلم نے لیلۃ القدر کے بارے میں جو فرمایا وہ تمہیں معلوم ہے کہ: ”اسے آخری دس راتوں میں تلاش کرو،“ پس تمہاری کیا رائے ہے کہ یہ کن طاق راتوں میں ہو سکتی ہے؟“ بعض نے کہا: نویں رات، بعض نے ساتویں، کسی نے پانچویں اور کسی نے تیسری رات کا کہا، پھر انہوں نے مجھ سے پوچھا: ”اے ابن عباس! تم کیوں نہیں بولتے؟“ میں نے عرض کیا: ”اگر آپ کی اجازت ہو تو میں کلام کروں،“ انہوں نے فرمایا: ”میں نے تمہیں بلایا ہی اس لیے ہے کہ تم گفتگو کرو،“ میں نے پوچھا: ”کیا میں اپنی رائے پیش کروں؟“ انہوں نے فرمایا: ”میں تم سے تمہاری رائے ہی دریافت کر رہا ہوں،“ تو میں نے عرض کیا: ”بے شک میں نے دیکھا ہے کہ اللہ تعالی نے سات کے عدد کو بڑی اہمیت دی ہے؛ آسمان سات بنائے اور زمینیں سات بنائیں، اور (زمین کی نباتات کے ذکر میں) فرمایا: ﴿ثُمَّ شَقَقْنَا الْأَرْضَ شَقًّا (26) فَأَنْبَتْنَا فِيهَا حَبًّا (27) وَعِنَبًا وَقَضْبًا (28) وَزَيْتُونًا وَنَخْلًا (29) وَحَدَائِقَ غُلْبًا (30) وَفَاكِهَةً وَأَبًّا﴾ [سورة عبس: 26 - 31] ، پس «حدائق» سے مراد ہر وہ درخت ہے جو ایک دوسرے میں پیوست ہو کر باغ بن جائے، اور «أبّ» سے مراد وہ سبزہ ہے جو زمین سے اگتا ہے اور انسانوں کے کھانے کے کام نہیں آتا (بلکہ چارہ ہے)۔“ تو سیدنا عمر رضی اللہ عنہ نے (دیگر صحابہ سے) فرمایا: ”کیا تم اس نوجوان جیسی بات کرنے سے بھی عاجز آگئے جس کے سر کے جوڑ ابھی پوری طرح ملے بھی نہیں؟“ پھر مجھ سے فرمایا: ”میں نے تمہیں (پہلے) کلام کرنے سے منع کیا تھا، لیکن اب جب میں تمہیں ان کے ساتھ مدعو کروں تو تم ضرور بات کیا کرو۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6430]