سیدنا عبداللہ بن عباس رضی اللہ عنہما سے روایت ہے کہ سیدنا عمر رضی اللہ عنہ مجھ سے رسول اللہ صلی اللہ علیہ وسلم کے دیگر جلیل القدر صحابہ کی موجودگی میں علمی سوالات کیا کرتے تھے، تو سیدنا عبدالرحمن بن عوف رضی اللہ عنہ نے (اعتراضاً) ان سے کہا: ”آپ ان سے سوال کرتے ہیں حالانکہ ہمارے بھی ان جیسے بیٹے ہیں (یعنی یہ ابھی کم عمر ہیں)؟“ اس پر سیدنا عمر رضی اللہ عنہ نے فرمایا: ”یہ ان لوگوں میں سے ہیں جن کے علمی مقام کے بارے میں تم بخوبی جانتے ہو۔“ ابن عباس رضی اللہ عنہما کہتے ہیں کہ پھر سیدنا عمر رضی اللہ عنہ نے سب سے اللہ تعالی کے اس فرمان ﴿إِذَا جَاءَ نَصْرُ اللَّهِ وَالْفَتْحُ﴾ [سورة النصر: 1] کے متعلق دریافت کیا، تو میں نے عرض کیا: ”اس سے مراد رسول اللہ صلی اللہ علیہ وسلم کی وفات کا وقت قریب آنا ہے (جس کی اطلاع اس سورت میں دی گئی ہے)؛“ اور میں نے پوری سورت ﴿إِنَّهُ كَانَ تَوَّابًا﴾ تک تلاوت کی، تو سیدنا عمر رضی اللہ عنہ نے فرمایا: ”اللہ کی قسم! میں بھی اس سورت کے بارے میں وہی کچھ جانتا ہوں جو تم جانتے ہو۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6429]