سیدنا عبداللہ بن زبیر رضی اللہ عنہما سے روایت ہے، انہوں نے فرمایا: میری یہ تمنا تھی کہ کاش رسول اللہ صلی اللہ علیہ وسلم نے مجھے اذان دینے کا منصب عطا فرمایا ہوتا۔ ان سے پوچھا گیا: ایسا کیوں؟ انہوں نے فرمایا: اس لیے کہ مؤذن قیامت کے دن سب لوگوں سے لمبی گردنوں والے (ممتاز) ہوں گے۔
یہ حدیث صحیح الاسناد ہے لیکن شیخین نے اسے روایت نہیں کیا۔ (امام حاکم فرماتے ہیں:) میں نے عبداللہ بن زبیر کی شہادت کے ذکر میں حجاج بن یوسف کی اللہ اور اس کے رسول پر جرات، حرمین کی بے حرمتی اور صدیق اکبر رضی اللہ عنہ کے اہل خانہ کے ساتھ اس کی توہین آمیز روش کا جو تذکرہ کیا ہے وہ ایک عقل مند کے لیے اس کی حقیقت جاننے کو کافی ہے، اب حجاج کے متعلق صحابہ اور تابعین کے اقوال اور اس کے بد عقیدہ ہونے پر ان کی شہادتیں ملاحظہ کریں جو انہوں نے عبداللہ بن عمر، عبداللہ بن زبیر اور سعید بن جبیر کے قتل کے بعد دیں۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6488]