حشرج بن نباتہ فرماتے ہیں: میں نے سیدنا سفینہ رضی اللہ عنہ سے ان کا نام پوچھا تو انہوں نے فرمایا: میرا اصلی نام ” قیس “ تھا، رسول اللہ صلی اللہ علیہ وسلم نے میرا نام ” سفینہ “ رکھا۔ میں نے پوچھا: رسول اللہ صلی اللہ علیہ وسلم نے تمہارا نام سفینہ کیوں رکھا؟ انہوں نے کہا: ایک دفعہ رسول اللہ صلی اللہ علیہ وسلم اپنے صحابہ رضی اللہ عنہم کے ہمراہ کسی سفر پر نکلے، ان کو ان کا سامان بھاری لگ رہا تھا، حضور صلی اللہ علیہ وسلم نے مجھے فرمایا: اپنی چادر بچھاؤ، میں نے اپنی چادر بچھا دی، آپ صلی اللہ علیہ وسلم نے ان کا سارا سامان اس چادر میں ڈال کر میرے اوپر لاد دیا اور فرمایا: تم یہ اٹھا لو، تم تو سفینہ ہو۔ آپ فرماتے ہیں اس دن ایک یا دو یا پانچ یا چھ جتنے بھی اونٹوں کا بوجھ مجھ پر لاد دیا جاتا، وہ مجھے ہرگز بھاری نہ لگتا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6693]