سلیمان اپنے والد ابان سے اور وہ اپنے والد سلیمان سے روایت کرتے ہیں کہ سیدنا قباث بن اشیم رضی اللہ عنہ کے اسلام لانے کا قصہ یہ ہے کہ ان کی قوم اور دیگر عربوں کے کچھ لوگ ان کے پاس آئے اور کہنے لگے: ”محمد بن عبداللہ بن عبدالمطلب نے نکل کر ایک ایسے دین کی دعوت دی ہے جو ہمارے دین سے الگ ہے“، چنانچہ قباث کھڑے ہوئے اور رسول اللہ صلی اللہ علیہ وسلم کی خدمت میں حاضر ہوئے، جب وہ آپ صلی اللہ علیہ وسلم کے پاس داخل ہوئے تو آپ صلی اللہ علیہ وسلم نے فرمایا: ”اے قباث! بیٹھ جاؤ“، قباث حیرت زدہ ہو کر چپ ہو گئے، پھر رسول اللہ صلی اللہ علیہ وسلم نے فرمایا: ”تم وہی ہو جس نے کہا تھا کہ اگر قریش کی عورتیں نکل پڑیں تو وہ محمد اور ان کے ساتھیوں کو (مکے سے) نکال دیں گی؟“ قباث نے کہا: ”اس ذات کی قسم جس نے آپ کو حق کے ساتھ بھیجا ہے! یہ بات نہ تو میری زبان پر آئی، نہ میرے ہونٹوں نے اس کی بھنبھناہٹ کی اور نہ ہی کسی نے یہ بات مجھ سے سنی، یہ تو محض ایک خیال تھا جو میرے دل میں پیدا ہوا تھا، میں گواہی دیتا ہوں کہ اللہ کے سوا کوئی سچا معبود نہیں وہ اکیلا ہے اس کا کوئی شریک نہیں، اور میں گواہی دیتا ہوں کہ آپ اس کے بندے اور رسول ہیں اور جو کچھ آپ لائے ہیں وہ برحق ہے۔“ [المستدرك على الصحيحين/كتاب معرفة الصحابة رضي الله تعالى عنهم/حدیث: 6770]