اسماعیل بن عبید بن رفاعہ بن رافع زرقی اپنے والد سے، وہ ان کے دادا سے روایت کرتے ہیں کہ رسول اللہ صلی اللہ علیہ وسلم نے سیدنا عمر بن خطاب رضی اللہ عنہ سے فرمایا: اے عمر! اپنی قوم کو میرے پاس جمع کرو، سیدنا عمر رضی اللہ عنہ نے سب کو جمع کیا اور حضور صلی اللہ علیہ وسلم کی بارگاہ میں حاضر ہو کر عرض کی: یا رسول اللہ صلی اللہ علیہ وسلم میں نے سب کو جمع کر لیا ہے، وہ آپ کے پاس اندر آ جائیں یا آپ خود ان کے پاس تشریف لے جائیں گے؟ آپ صلی اللہ علیہ وسلم نے فرمایا: میں خود ان کے پاس جاتا ہوں، یہ بات مہاجرین اور انصار نے سن لی، وہ لوگ کہنے لگے: قریش میں وحی نازل ہوئی، تو دیکھنے والے اور سننے والے سب لوگ (یہ سننے کے لئے) حاضر ہو گئے کہ ان کو کیا حکم دیا جاتا ہے؟ آپ صلی اللہ علیہ وسلم نے فرمایا: کیا تم میں کوئی غیر شخص تو نہیں ہے؟ انہوں نے کہا: جی ہاں، ہمارے حلیف، ہمارے بیٹے، ہمارے بھائی اور ہمارے موالی موجود ہیں۔ رسول اللہ صلی اللہ علیہ وسلم نے فرمایا: ہمارے حلیف بھی ہم میں سے ہی ہیں اور ہمارے بھائی بھی ہم میں سے ہی ہیں۔ پھر آپ صلی اللہ علیہ وسلم نے فرمایا: کیا تم نے یہ بات نہیں سن رکھی کہ تم میں سے میرا ولی وہ شخص ہے جو پرہیزگار ہے، اگر تمہارے اندر پرہیزگاری ہے تو ٹھیک ہے۔ ورنہ تم بہت غور فکر کر لو، لوگ اعمال ہرگز نہیں لائیں گے اور تم بوجھ لاتے ہو تو تم سے اعراض کر لیا جاتا ہے۔ پھر حضور صلی اللہ علیہ وسلم نے بلند آواز سے ندا دیتے ہوئے فرمایا ” بے شک قریش اہل امانت ہیں، جس نے ان کے خلاف سازش کی، اللہ تعالیٰ اس کو منہ کے بل گرا دے گا۔ یہ بات حضور صلی اللہ علیہ وسلم نے تین مرتبہ دہرائی۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 7128]