سیدنا ابوہریرہ رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: بے شک اللہ تعالیٰ نے اہل بدر کو فضیلت بخشی، ان کے بارے میں فرمایا: تم جو چاہو عمل کرو، میں نے تمہیں بخش دیا ہے۔ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو ان الفاظ (ان اللہ اطلع علیہم فغفر لہم) کے ساتھ نقل نہیں کیا۔ (اس حدیث میں اس بات کو ایسے الفاظ کے ساتھ تعبیر کیا گیا ہے جس سے یہ ظاہر ہوتا ہے کہ اہل بدر کو یہ سعادت یقینی طور پر مل چکی ہے، جبکہ امام بخاری رحمۃ اللہ علیہ اور امام مسلم رحمۃ اللہ علیہ کی روایت کردہ حدیث میں ” وما یدریک لعل اللہ تعالیٰ اطلع علی اہل بدر “ کے الفاظ ہیں، جن میں بدری صحابہ کرام کی حتمی مغفرت کے یقین کی بجائے، ظن غالب اور امید ظاہر کی گئی ہے۔ جیسا کہ کہا گیا ہے ” تجھے کیا معلوم، ہو سکتا ہے کہ اللہ تعالیٰ نے ان کی مغفرت کر دی ہو “) [المستدرك على الصحيحين/كتاب معرفة الصحابة رضي الله تعالى عنهم/حدیث: 7144]