سیدنا عمرو بن عبسہ سلمی رضی اللہ عنہ فرماتے ہیں کہ رسول اللہ صلی اللہ علیہ وسلم غزوہ کے لئے تیار کئے گئے گھوڑوں کا معائنہ فرما رہے تھے، اس وقت آپ صلی اللہ علیہ وسلم کے پاس عیینہ بن بدرالفزاری موجود تھے، رسول اللہ صلی اللہ علیہ وسلم نے ان سے کہا: گھوڑوں کے بارے میں تجھ سے زیادہ میں جانتا ہوں، سیدنا عیینہ نے کہا: اور میں مردوں کے بارے میں آپ سے زیادہ جانتا ہوں۔ رسول اللہ صلی اللہ علیہ وسلم نے فرمایا: بتایئے سب سے بہتر مرد کون ہے؟ عیینہ نے کہا: نجد کے وہ باشندے وہ جو اپنی تلواریں اپنے کندھوں پر اٹھاتے ہیں، اپنے نیزے اپنے گھوڑوں کی زینوں پر رکھتے ہیں، رسول اللہ صلی اللہ علیہ وسلم نے فرمایا: تم نے جھوٹ بولا ہے (بہترین مرد نجد کے لوگ نہیں) بلکہ بہترین مرد، یمن کے مرد ہیں۔ اور یمن سے لخم اور جذام تک کے لوگوں ایمان قابل قدر ہے، اور وہاں کے کھانوں میں سے بہترین کھانا حمیر کا کھانا ہے، اور حضرموت، بنی الحارث سے اچھے ہیں، اور اللہ کی قسم! مجھے کوئی پرواہ نہیں ہے کہ تمام حارثین ہلاک ہو جائیں۔ چار بادشاہوں پر اللہ تعالیٰ کی لعنت ہو۔ (وہ چار بادشاہ یہ ہے) جمدا، مخوسا، ابضعہ، ان کی بہن عمردہ۔ پھر فرمایا: اللہ تعالیٰ نے مجھے دو مرتبہ حکم دیا کہ میں قریش پر لعنت کروں، میں نے ان پر لعنت کی، اور اللہ تعالیٰ نے دو مرتبہ مجھے حکم دیا کہ میں ان کی نماز جنازہ پڑھوں، میں نے دونوں مرتبہ ان کی نماز جنازہ پڑھی، پھر حضور صلی اللہ علیہ وسلم نے تمیم بن مرہ پر پانچ مرتبہ اور بکر بن وائل پر سات مرتبہ لعنت فرمائی۔ بنی تمیم کے قبیلوں میں سے مقاعس اور ملادس پر لعنت کی، پھر فرمایا: کچھ لوگ نافرمان ہیں، انہوں نے اللہ اور اس کے رسول کی نافرمانی کی ہے۔ وہ عبد قیس، جعدہ اور عصمہ ہیں۔ پھر فرمایا: قیامت کے دن قبیلہ اسلم، غفار اور مزینہ اور جہینہ میں سے ان کے حلیف قبائل، بنی اسد، تمیم اور غطفان اور ہوازن سے بہتر ہوں گے۔ پھر فرمایا: عرب کے قبیلوں میں سب سے برے دو قبیلے ہیں، نجران اور بنو تغلب۔ مذحج کے اکثر قبیلے جنتی ہوں گے۔ ٭٭ یہ حدیث غریب المتن اور صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 7155]