سیدنا عمیر رضی اللہ عنہ جو آبی اللحم کے آزاد کردہ غلام تھے، ان سے روایت ہے، انہوں نے کہا: میں اپنے آقاؤں کے ساتھ ہجرت کے ارادے سے نکلا یہاں تک کہ جب ہم مدینہ منورہ کے قریب پہنچے تو انہوں نے مجھے اپنے پیچھے چھوڑ دیا اور خود مدینہ میں داخل ہو گئے، مجھے سخت بھوک لگی، مدینہ کے ایک گزرنے والے شخص نے مجھ سے کہا: اگر تم مدینہ کے کسی باغ میں چلے جاؤ تو وہاں سے پھل حاصل کر سکتے ہو، چنانچہ میں ایک باغ میں داخل ہوا اور ایک کھجور کے درخت سے دو خوشے توڑ لیے، اچانک باغ کا مالک آگیا اور وہ مجھے پکڑ کر رسول اللہ صلی اللہ علیہ وسلم کی خدمت میں لے آیا، آپ صلی اللہ علیہ وسلم نے مجھ سے میرا حال پوچھا تو میں نے آپ کو بتا دیا، آپ صلی اللہ علیہ وسلم نے (خوشوں کی طرف اشارہ کر کے) پوچھا: ”ان میں سے کون سا زیادہ بہتر ہے؟“ میں نے ایک کی طرف اشارہ کیا، تو آپ صلی اللہ علیہ وسلم نے مجھے وہ لینے کا حکم دیا اور باغ کے مالک کو دوسرا خوشہ لینے کا حکم دیا، اور میرا راستہ چھوڑ دیا۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب الأطعمة/حدیث: 7364]