سیدنا ابوسعید خدری رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: جب تم کسی کنویں پر آؤ تو اس کے مالک کو تین آوازیں ضرور دو، اگر وہ جواب دے تو ٹھیک ہے ورنہ اس کی اجازت کے بغیر وہاں سے پی سکتے ہو، لیکن اس کا بقیہ پانی خراب نہ ہونے دینا۔ اور جب تم کسی باغ میں جاؤ، باغ کے مالک کو تین مرتبہ آواز دو، اگر وہ تمہیں جواب دے دے تو ٹھیک ہے، ورنہ تم (اجازت کے بغیر) کھا سکتے ہو، لیکن کچھ بھی خراب نہ کیا جائے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْأَطْعِمَةِ/حدیث: 7363]

آبی اللحم کے غلام سیدنا عمیر رضی اللہ عنہ بنی غفارہ کے غلام تھے، آپ فرماتے ہیں: ہم اپنے آقاؤں کے ہمراہ ہجرت کر کے آ رہے تھے، ہم لوگ مدینہ منورہ کے قریب پہنچ چکے تھے، کہ ان لوگوں نے مجھے اپنے پیچھے چھوڑ دیا اور خود مدینہ شریف پہنچ گئے، مجھے بہت سخت بھوک لگ گئی، مدینہ کے کوئی لوگ میرے پاس سے گزرے تو انہوں نے مجھے کہا: اگر تم مدینے کے کسی باغ میں چلے جاؤ تو تمہیں کھانے کے لئے کھجوریں مل سکتی ہیں۔ میں ایک باغ میں چلا گیا، ایک درخت پر چڑھا اور دو گچھے توڑ لئے، اچانک باغ کا مالک آ گیا، وہ مجھے لے کر رسول اللہ صلی اللہ علیہ وسلم کی خدمت میں پہنچ گیا، حضور صلی اللہ علیہ وسلم نے مجھ سے کھجوریں توڑنے کی وجہ پوچھی تو میں نے سارا ماجرا کہہ سنایا، حضور صلی اللہ علیہ وسلم نے فرمایا: ان دونوں گچھوں میں سے اچھا کون سا ہے؟ میں نے ان میں سے ایک کی طرف اشارہ کر دیا، حضور صلی اللہ علیہ وسلم نے مجھے حکم دیا کہ وہ گچھہ میں لے لوں، اور باغ کے مالک کو کہا کہ دوسرا تم لے لو، اور اس کا پیچھا چھوڑ دو۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَطْعِمَةِ/حدیث: 7364]