سیدنا ابو ادریس خولانی رضی اللہ عنہ سے روایت ہے کہ میں ایک ایسی مجلس میں بیٹھا جس میں رسول اللہ صلی اللہ علیہ وسلم کے بیس صحابہ کرام موجود تھے، ان میں ایک نہایت خوش رو اور وجیہہ نوجوان بھی تھا جس کی آنکھیں گہری سیاہ اور سامنے کے دانت چمکدار تھے، جب صحابہ کسی بات میں اختلاف کرتے اور وہ نوجوان اپنی رائے دیتا تو سب اس کے قول پر متفق ہو کر رک جاتے، معلوم کرنے پر پتہ چلا کہ وہ سیدنا معاذ بن جبل رضی اللہ عنہ ہیں، جب اگلا دن ہوا تو میں دوبارہ آیا تو دیکھا کہ وہ ایک ستون کے پاس نماز پڑھ رہے ہیں، انہوں نے اپنی نماز مختصر کی اور پھر گھٹنوں کو پیٹ کے ساتھ لگا کر بیٹھ گئے اور خاموش رہے، میں نے کہا: ”میں اللہ کی عظمت کی خاطر آپ سے محبت کرتا ہوں“، انہوں نے پوچھا: ”اللہ کی قسم؟“ میں نے کہا: ”اللہ کی قسم“، تو انہوں نے کہا: ”بے شک اللہ کی خاطر ایک دوسرے سے محبت کرنے والوں کے لیے — میرا خیال ہے کہ انہوں نے یہ بھی کہا: قیامت کے دن اللہ کے سائے میں جب اس کے سائے کے سوا کوئی سایہ نہ ہوگا، اور باقی الفاظ میں کوئی شک نہیں— نور کے منبر بچھائے جائیں گے، ان کے بیٹھنے کے مقام کو دیکھ کر انبیاء، صدیقین اور شہداء بھی ان پر رشک کریں گے۔“ ابو ادریس کہتے ہیں کہ پھر میں نے یہ بات سیدنا عبادہ بن صامت رضی اللہ عنہ کو بتائی تو انہوں نے کہا: میں تمہیں وہی بات بتاؤں گا جو میں نے خود رسول اللہ صلی اللہ علیہ وسلم کی زبانِ مبارک سے سنی ہے کہ آپ صلی اللہ علیہ وسلم نے فرمایا: ”میری محبت ان لوگوں کے لیے ثابت ہو گئی جو میری خاطر ایک دوسرے سے محبت کرتے ہیں، میری محبت ان کے لیے لازم ہو گئی جو میری خاطر ایک دوسرے پر مال خرچ کرتے ہیں، میری محبت ان کے لیے واجب ہو گئی جو میری خاطر ایک دوسرے کے لیے دل صاف رکھتے ہیں، میری محبت ان کے لیے حق ہو گئی جو میری خاطر ایک دوسرے سے ملنے جاتے ہیں اور میری محبت ان کے لیے یقینی ہو گئی جو میری خاطر ایک دوسرے سے تعلق جوڑتے ہیں۔“ شعبہ کو «الْمُتَوَاصِلِينَ» اور «الْمُتَزَاوِرِينَ» کے الفاظ میں شک ہوا ہے۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كتاب البر والصلة/حدیث: 7504]